Որպես ընդդիմություն էլ մենք կպահենք մեր դեմքը
Posted on September 30, 2009, by admin, under Հարցազրույցներ.
ՀՅԴ Բյուրոյի ներկայացուցիչ ընկ. Հրանտ Մարգարյանի հարցազրույցը «Ազատություն» ռադիոկայանին
«Մեր նպատակը իշխանափոխությունը չէ, մեր նպատակն է`թույլ չտալ, որ այս պայմանագիրը ստորագրվի»
-Պարոն Մարգարյան վերջին ասուլիսում, Դուք ասացիք, որ ուզում եք հանդիպել Նախագահ Սերժ Սարգսյանին -Մեկ հանդիպում արդեն եղել է: Նախագահն ասել է, որ տեղի է ունենալու հասարակական քննարկում, մի բան, որ, ինչպես ես տեսնում եմ տեղի չի ունենում: Եվ ճիշտ հակառակն է տեղի ունենում` արհեստականորեն ստեղծվում է իրենց տեսակետներին համահունչ քարոզչական մթնոլորտ, որի հարվածը, կարծում եմ, իրենք են ստանալու: Քննարկումները, ինչպես, որ ծրագված են, եւ այն ձեւով, որ տեղի են ունենում, վատ հետեւանք են ունենալու առաջին հերթին հենց իշանությունների համար: Նախ` ժողովրդի համար այսքան լուրջ հարցը այսպես անլուրջ քննարկել եւ փորձել ցույց տալ, թե քննարկումը տեղի է ունենում, վստահ եմ` ժողովուրդը չի հանդուրժելու: Եվ սա բերելու է հակազդեցություն, որն ուղղված է լինելու իշխանությանը: -Այսինքն կարծում եք, որ նախագահի կողմից այդ արձանագրությունները ստորագրելուց հետո իշխանափոխությո՞ւն տեղի կունենա: -Իշխանափոխություն անպայման տեղի կունենա, ե՞րբ չգիտեմ: Այս երեւութը խախատեց նախագահի ունեցած հենարարնները (ազգային ուժեր, դեմոկրատական ուժեր): Այլեւս նրա իշխանությունը խախուտ է եւ թե որքան այն կերկարաձգվի, չեմ կարող ասել: -Ամեն դեպքում կարծում եք, այդ իշխանափոխությունը մինչեւ նրա պաշտոնավարման ավա՞րտը տեղի կունենա: Չէ՞ որ իշխանափոխություն չի կարող կոչվել, եթե ժամկետի սահմաննրում է հեռանում նախագահը: -Նույնիսկ, եթե մինչեւ ժամկետի ավարտը լինի, նախագահի համար մեկ է` ձախողում է: Ես կանխատեսումներով չեմ առաջնորդվում, բայց վստահ եմ, որ այս երեւույթը մեր ժողովուրդը չի հանդուրժի: -Կարծում եք բուռն ընդվզում կլինի՞: -Ժողովրդի դժգոհությունը ինչ-որ ձեով կդրսեւորվի: -Արդյոք Դաշնակցությունը նախաձեռնելո՞ւ է որեւէ ընդվզում ուղղված իշխանափոխությանը` արձանագրությունների ստորագրումից հետո: -Արդեն նախաձեռնել ենք եւ տեսնում ենք նաեւ ժողովրդի վերաբերմունքը: Եթե իշխանությունը որեւէ բան է ձեռնարկել եւ մենք դրան հակառակ գործընթաց ենք սկսել, բնականաբար այն ուղղված է իշխանությունների դեմ : Այն առաջխաղացումը, որ ես ժողովրդի կողմից տեսնում եմ` հրապարակում տեղի ունեցող ստոագրահավաքը, իսկապես մեզ էլ է զարմացրել: Ողջ օրվա ընթացքում հոսքը գրեթե չի դադարում: Մարդիկ ստորագրում են կամավոր, ոչ ստիպողաբար: Դա խոսում է այն մասին, որ ժողովրդի մի մասը, որը տեղյակ է անցուդարձին, վրդովված է եւ դժգոհ: Եվ բնականաբար այս ամենը անհետեւանք չի մնա: -Ուզում եմ հասկանալ` ստորագրումից հետո, այդ վրդովված զանգվածին Դաշնակցությունը կհամախմբի՞ նպատակ ունենալով հասնել իշխանափոխության` հաշվի առնելով , որ իշխանությունները գնալու են այդ քայլին եւ ստորագրելու են այս արձանագրությունը: -Մեր նպատակը իշխանափոխությունը չէ, մեր նպատակն է` թույլ չտալ, որ այս պայմանագիրը ստորագրվի: Հոկտեմբերի 9-ին մեծ ժողավրդական երթ ենք կազմակերպելու հանրապետության հրապարակից դեպի նախագահի նստավայր եւ հետո Ծիծեռնակաբերդ, որտեղ եւ տեղի է ունենալու մեծ հանրահավաք: Կարծում եմ սա շատ խորհրդանշական է: Ողջ շինծու պատկերը, որ ստեղծվել է այս քննարկումների փուլում պետք է փուլ գա: -Պարոն Մարգարյան, մենք տեսնում ենք, որ արտաքին քաղաքականության դաշտում որեւէ ողեգծի փոփոխություն, որին ուզում է հասնել Դաշնակցությունը, դեռեւս չի նկատվում: Ընդհակառակը` նախագահը կարծես վճռական է տրամադրված` ստորագրել արձանագրությունները: Այդ դեպքում, ինչի՞ վրա եք հույս դրել, որ կարող է հանկարծ նախագահը չստորագիր փաստաթուղթը: Այսինքն որտե՞ղ եք տեսել այդ ուղեգծի փոփոխման հնարավորությունը: -Չգիտեմ, ուղեգիծ ասելով ինչ նկատի ունեք, բայց հայության ուղեգծից շեղում կա: Արդյոք Սփյուռքի ձայնը նախագահին որեւէ բան կտա՞: Հույս ունեմ, որ կտա: Ողջ պայքարի նպատակն էլ այն է, որ տա: Սակայն այնպես էլ չի, որ եթե նա ստորագրի, մենք դրանով կպարտվենք: Մեր պայքարը շարունակվելու է, որովհետեւ այդ փաստաթուղթը պետք է վավերացվի: Իսկ վավերացվելուց հետո էլ պետք է կյանքում իրագործվի : Մեր պայքարը երկար է, եւ ես հավատում եմ, որ բարձրացող ալիքը, այնքան հիմնավորված ու արմատական ալիք է, որ շատ բան իր ճանապարհի վրայից կմաքրի: -Ի՞նչ է դա նշանակում: -Նշանակում է, որ այդ այդ պայմանագիրը աճ չի ունենա: -Չի ստորագրվելո՞ւ, թե՞ ստորագրվելուց հետո կյանքի չի կոչվելու: -Կրկնում եմ` ստորագրվելով ամեն բան չի վերջանում, նոր է սկսում: Դա չի ունենա իր ավարտը: -Որովհետեւ ժողովո՞ւրդը ոտքի կկանգնի, թե պարզապես իշխանությունները հետ կքաշվեն: -Երկուսը միաժամանակ կլինի: Ժողովուրդը ոտքի կկանգնի,իսկ նրանք կպարտավորվեն մի կողմ քաշվել: -Իսկ հնարավոր չէ՞, որ մինչեւ արտգործնախարարների կամ նախագահների կողմից այդ արձանարություների ստորագրումը ժողովուրդն ընդվզի: -Ամեն հարց ունի իր հասունացման շրջանը, ունի նաեւ իրականացման տրամաբանական ժամանակը: Մենք այս քսան օրվա ընթացքում հանգեցինք մի մեծ եզրակացության: Սպասեցինք, որ քննարկում տեղի ունենա: Քննարկում տեղի չունեցավ: Սպասեցինք, որ մարդիկ առնվազն բարոյական կեցվածք կդրսեվորեն կկարողանան հավասարակշռված ներկայացնել ժողովրդի տրամադրությունը, բայց տեղի է ունենում ճիշտ հակառակը: Սրանք բաներ են, որոնք, բնականաբար, հասունացնում են պահը: Ես վստահ եմ, որ իրենք այսօր շատ լավ գիտեն թե ժողովրդի տրամադությունը, թե քաղաքական ուժերի եւ մտավորականության տրամադրվածությունը: Ուշադրություն մի դարձրեք այն ամենին, ինչ պաշտոնական, թատերականացված ձեւով ներկայացվում է հեռուստատեսությամբ: Համենայնդեպս հույս ունեմ, որ նախագահը հոկտեմբերի 10-ին չի ստորագրի պայմանագիրը: -Հորդորել եք նախագահին չստորագրել, վերջին հանդիպման ընթացքում: -Բականաբար: -Եվ ի՞նչ, ստորագրելու է: -Ասաց, որ դեռ կտեսնի: Ի դեպ, Սփյուռքում այս հարցը շատ ավելի ցավագին է ընդունվում: Ցավագին, որովհետեւ այնտեղ ընդվզումը շատ ավելի մեծ է: Այնտեղ էլ կարելի է թատերականացված խորհրդակցություններ կազմակերպել, բայց դրա հետեւանքը շատ ավելի վատ է լինելու իշխանության համար: Քննարկումը որքան իրական լինի, եւ այդ իրականությանը մենք համարձակություն ունենանք բաց աչքերով նայել, գործն ավելի կհեշտանա որոշում առնելու, իրավիճակը ղեկավարելի պահելու առումով: Չի կարելի փորձենլ ներկայացումներ կազմակերպել եւ արդյունքն իբրեւ Սփյուռքի տեսակետ ներկայացնել: Սփյուռքի գրեթե բոլոր գաղութներում անցկացվում են հավաքներ, ցույցեր, ստորագրահավք: Ցուցադրական քննարկումների պարագայում, ես վստահ եմ, պատկեր չի լինելու: Որքան էլ փորձեն շինծու խորհրդակցություններ կազմակերպել, վստահ եմ, որ նախագահն այնտեղ հանդիպելու է այլ իրականության: Այդ մասն ինձ համար մտահոգիչ չէ, ինձ համար մտահոգիչն այն է , որ մեր նախագահը իրականության հետ հաշվի նստի: Արդյոք արդեն հայտնվել է մի հոսքի մեջ, որտեղից վերադարձ չի՞ տեսնում: Ուզում եմ հավատալ եւ վստահ լինել նաեւ, որ կա այդ վերադարձի հնարավորությունը: Ինչպես ամեն սխալի համար մենք պատրաստ ենք գին վճարել, այս սխալի համար եւս կպարտավորվենք գին վճարել: Բայց ավելի լավ է, այդ սխալի համար, մենք արտաքին ճակատում գին վճարենք քան ներքին: Եթե սխալի դեմն առնենք ու կանգ առնենք նախագահը կվայելի իր ժողովրդի հարգանքը եւ նրան կունենա իբրեւ իրեն թիկունք, իսկ եթե փորձի շարունակել ճանապարհը արտաքին ճակատում կարժանանա մի քանիսի ժպիտներին, իսկ ներքին ճակատում կկորցնի այն, ինչ իր իշխանության գոյատեւման համար շատ կարեւոր է: Մտահոգությունս մեծ է, որովհետեւ այս քայլով նախագահը նաեւ իր կենսագրությունն է վտանգում: Սա շատ լուրջ պահ է, եւ ես ուզում եմ, որ նախագահը այս ամենը գիտակցի եւ ունենա ՙկանգ առնելու՚ քաջություն: -Կոնկրետ ինչ քայլեր է անելու Դաշնակցությունը Ժառանգության հետ միասին: Արդեն որոշվե՞լ է քայլերի շրջանակը: -Դեռ ոչ: Բնականաբար մեր միջոցառումներին մենք տեղ ենք տալիս բոլոր նրանց ում նպատակը հայ-թուրքական այս կարգի հարաբերությունները կանխելն է : Բոլորին ասպարեզ ենք տալու, այս առումով մենք քաղաքական, կուսակցական հարց չունենք: Այս հարցը մեզ համար ազգային հարց է: Առհասարակ բոլոր ազգերի ազգային համախմբումը, կարծում եմ հույժ կարեւոր է: Ես ուրախ եմ, որ Ժառանգությունը նման եզրակացության է հանգել եւ ողջունում եմ: -Այսինքն ժառանգությունը եւս կմասնակցի Ձեր հացադուլին, նստացույցին բոլոր ակցիաներին: -Կոնկրետ նստացույցի առումով ոչ, բայց զորակցությունն արդեն նկատելի է: -Ի՞նչ ձեւով: -Թե ստորագրահավքի, թե վերաբերմունքի եւ թե կեցվածքների առումներով: -Իսկ միասնական գործելու կոնկրետ շրջանակ կա՞: -Դա առայժմ առջեւում է: -Այսպիսի մի տեսակետ կար, որ Ժառանգություն-Դաշնակցություն համագործակցությունը (նաեւ մամուլում է այդպես հնչեցվել) իշխանոիւթյունների կողմից առաջնորդված, գծված մի ծրագիր է: -Դա սուտ է: Մեծ սուտ: Ցավոք սրտի նման ստերի տարածումը մեր կյանքում, շատ մեծ նախադեպեր ունի, որոնք այլ նպատակներ են հետապնդում: Երկար ժամանակ մեր քաղաքական դաշտը բեւեռացած էր, եւ այդ բեւեռները, ցավոք սրտի, թշնամաբար են վերաբերվում որեւէ այլ ուժի ասպարեզ գալուն եւ միջոցների մեջ խտրականություն չեն դնում վերջինիս ոչնչացնելու համար: Դիմում են ամենաանբարոյական քայլերի, միայն թե քաղաքական դաշտը մնա բեւեռացված: Այդ բեւեռացված մթնոլորտի մեջ առկա է հակաժողովրդական գործելակերպին դիմելու սովորույթյուն: Մենք դրան դեմ ենք կանգնելու: Մենք մեր ուղին ենք բացելու եւ այդ ուղին միայն մեր կուսակցության ուղին չէ: Բոլոր այն ինքնուրույն կուսակցություններինն է, որոնք չեն ուզում այս բեւեռներին կուլ գնալ եւ ուզում են Հայաստանի, հայ ժողովրդի համար ճիշտ ապագա ստեղծել: Ես հավատում եմ, որ մեր քաղաքական ուժերը պետք է ազատագրվեն այս երկու բեւեռին ծառայելու պարտադրանքից: Պետք է ստեղծվեն ինքնուրույն քաղաքական ուժեր, որոնք իրենց ներդրումով , իրենց հրապարակային գործունեությամբ կհարստացնեն մեր քաղաքական դաշտը եւ մեր ժողովրդին էլ կազատեն այս երկբեւեռ վիճակից: -Լեւոն Տեր-Պետրոսյանը վերջին հանրահավաքում ասաց, որ մինչեւ մյուս քաղաքական ուժերի ակտիվացումը հանրահավաքներ չեն լինելու: Ձեր կարծիքով ինչո՞վ է պայմանավորված այս պահին ՀԱԿ-ի հանրահավաքների դադարեցումը: -Ես հավատացած եմ, որ Լեւոն Տեր-Պետրոսյանը դեմ չի այս հարաբերություններին: Այն ինչ անում է Սերժ Սարգսյանը, ուրախացնում է Հայաստանի առաջին նախագահին: Հանրահավաքների դադարեցումը պատրվակ է, իրենց կեցվածքը արդարացնելու համար: Ապա թե ոչ` կար մի ընթացք, որ ուղղակի կամ անուղղակի անմիջական կամ հեռակա կարգով իշխանության մեկ ծրագրի դեմ էր ուղղված: Նրանք կարող էին հանգիստ ակտիվություն ունենալ եւ առանց համաձայնության գալու կարող էինք մեկս մյուսին հզորացնել: Նրանք ասպարեզից դուրս եկան, որպեսզի չխանգարեն իշխանությանը: Ես դրանում հավատացած եմ: Եվ հենց դրա համար եմ ասում, որ այդ բեւեռները մեր ժողովրդին լավ բան չեն բերի: Այդ բեւեռներից պետք է ձերբազատվել: Պետք է ստեղծել սեփական ուղի, սեփական ընթացք եւ այս ժողովրդին տանել իսկապես ամբողջական ազատագրման` տնտեսական, քաղաքական եւ ազգային հարցերում: -Իսկ այն պահին, երբ Դաշնակցությունը դնի նախագահի հրաժարականիպահանջը , այդդեպքում հնարավոր համարում եք ՀԱԿ-ի հետ համագործակցության հնարավորությունը: -Հրաժարական պահանջելու այն ճնշումը, որ այսօր գոյություն ունի, իմ մեջ ծիծաղ է առաջ բերում: Ասենք պահանջեցինք, ի՞նչ է լինելու: Նախագահը հրաժարական կտա՞: Ունե՞նք մենք այդ ուժը հրաժարական պարտադրելու: Իրենք ունե՞ն այդ ուժը: Դե թող պարտադրեին այսքան ժամանակ: -Ասում են միացեք, որ կարողանանք: – Իսկ ես ասում եմ, ընտրությունները 7 սարի հետեւում չեն: Եկեք աշխատենք, որ առանց ցնցումների ազատվենք այս վիճակից: Մեր ընթացքը նաեւ ազատագրում է նշանակում այս երկբեւեռ վիճակից: Սրանով մենք պետք է կարողանանք ապահովել հաջորդ ընտրությունների մեր իրական հաջողությունը: Իշխանության դաշտում, մենք իշխանությանը կցված ուժ չենք եղել երբեք, մենք կարողացել ենք պահել մեր ինքնուրույն դեմքը: Ընդդիմության մեջ էլ կշարունակենք պահել մեր ինքնուրույն դեմքը:
