Դաշնակցությունը ստեղծվել է հայ ժողովրդի անվտանգության եւ զարգացման համար
Posted on November 20, 2018, by admin, under Լուրեր, Հարցազրույցներ, Տեսաերիզներ.
Նոյեմբերի 20-ին «Երկիր Մեդիա» հեռուստաընկերության «Հարցեր` դաշնակցականներին» հաղորդաշարի հյուրն էր ՀՅԴ Բյուրոյի ներկայացուցիչ Հրանտ Մարգարյանը:
«Ժամանակի հետ փոփոխություն ապրել ենք, բայց դա մեր էության հետ չի առնչվել»,- հաղորդման ժամանակ ասել է Հրանտ Մարգարյանը:
Նա նշել է, որ Դաշնակցությունը ստեղծվել է, որպեսզի հայ ժողովուրդը կարողանա անվտանգ ապրել ու զարգանալ: «Այդ առումով մեր սկզբունքը չի փոխվել, մեր էությունը չի փոխվել բայց, բնականաբար, ժամանակներն են փոխվել, մեր գործելաոճն ու մեթոդիկան են փոխվել: Մենք դեռ զինվորագրված ենք հենց այդ դատին»,- նշել է Մարգարյանը:
Անդրադառնալով տարվա սկզբին քաղաքական բուռն իրադարձություններին և այդ հարցում Դաշնակցության դիրքորոշմանն ու դերակատարությանը` Բյուրոյի ներկայացուցիչը պատմել է, որ ժողովրդական շարժման դեռ նախօրեին` սկզբնական հանգրվանում, երբ դեռ երկու տասնյակ ժողովուրդ էր հավաքվել, ինքը հեռուստաելույթի ընթացքում (Առաջին լրատվական) ողջունել է շարժումը: «Ես ասել եմ, որ ողջունելի է դա, և մենք ուզում ենք, որ այս շարժումը հաջողի, արդյունավորվի, չլինի այնպես, որ այս շարժումը չհաջողի: Ես ուրախ եմ, որ հաջողել է»,- ասել է Մարգարյանը` ընդգծելով, որ ՀՅԴ-ի համար սրբության նման է եղել, որ ժողովուրդը ոտքի է կանգնել` իր իրավունքներին տեր կանգնելու, այն, ինչ վատն է, տգեղ է, վնասակար է, մերժելու և դրանով առաջ գնալու:
Մարգարյանը նաև նշել է, որ թեև աջակցել են շարժմանը, այնուամենայնիվ, ունեցել են լուրջ մտահոգություններ: «Ի սկզբանե մենք ունեցել ենք մտահոգություն. որքան ժողովրդային շարժումը հրաշք էր, լավն էր, իսկապես ոգևորող էր, երիտասարդության ներկայությունը բացառիկ էր, նույնքան և մտահոգությունն էր մեծ: Մենք նկատում էինք, որ ժողովուրդը ոտքի է կանգնել, որովհետև աղքատություն կա երկրում, կոռուպցիա կա երկրում, խտրական քաղաքականություն կա երկրում, անարդարություն կա երկրում, բայց մի շարք անձինք փորձում էին այդ շարժումը շեղել կամ ուղղորդել դեպի այլ տեղ: Այն, ինչ կոչվում է «գունավոր հեղափոխություն», որն այսօր ծանոթ հասկացություն է և տարբեր երկրներում իրականացվել է, մենք այդ հարցով էինք մտահոգ, որովհետև «գունավոր հեղափոխության» միակ գլխավոր նպատակը տվյալ երկիրը ռուսական ազդեցության դաշտից դուրս բերելու և Արևմուտքի ազդեցության դաշտ մտցնելն է: Բայց մեր ժողովուրդը դրա համար ոտքի չէր կանգնել, ժողովուրդը դրա համար փողոց դուրս չէր եկել, անարդարությունն էր նրան դուրս բերողը, խտրական քաղաքականությունը, աղքատությունը, բայց ժողովուրդը երբեք մտահոգ չի եղել, որ ռուսական բազաներ կան երկրում, ժողովուրդը երբեք չի ուզել, որ ազգայինը մերժվի մեր երկրում: Մենք շատ լավ ենք հասկացել, որ երբ այդ շարժումը մտնի, այսպես ասած, «գունավոր հեղափոխության» հանգրվան, առճակատումն անխուսափելի կլինի»,- ասել է Մարգարյանը:
Ըստ նրա` առճակատումից խուսափելու համար ՀՅԴ-ն ջանք չի խնայել: «Ճիշտ այդ պատճառով մենք մեծ ճիգ ենք թափել: Մեր դիրքը տալիս էր այդ հնարավորությունը, որ մի կողմից կապի մեջ լինենք Նիկոլ Փաշինյանի հետ` որպես շարժման ղեկավարի, մյուս կողմից` Սերժ Սարգսյանի հետ` իբրև փաստացի վարչապետի: Մենք փորձել ենք այդ առճակատման պահը թույլ չտալ, այսինքն` թույլ չտալ, որ մեր երկրում երկրորդ Մարտի 1 տեղի ունենա, արյունահեղություն, բախում տեղի ունենա, և, վերջապես, ամենակարևորը` մենք չպարտավորվենք այլ, օտար ծրագրի համար ազգային գին վճարել: Շատ պարզ է` Ուկրաինան գնաց այդ ուղղությամբ, Ղրիմով վճարեց այդ գինը, Վրաստանը գնաց այդ ուղղությամբ, Աբխազիայով վճարեց այդ գինը: Մենք չէինք ուզում, որ մենք գին վճարենք: Դրա համար էր, որ մենք ամեն ճիգ թափեցինք, որ այդ շարժումը արդյունավորվի առանց, այսպես ասած, Հայաստանի` աշխարհաքաղաքական փոփոխություն ապրելու»,- նշել է Բյուրոյի ներկայացուցիչը:
Նա պատմել է, որ հենց այդ ժամանակ էր, որ ՀՅԴ-ն ձևավորեց «քաղաքական հարթակ» հասկացությունը` համոզելով բոլորին, թե՛ Նիկոլին, թե՛ Սերժ Սարգսյանին, որ պահն այնպիսին է, որ չպետք է ուժերի բախումով հարց լուծել, պետք է քաղաքական ուժերի համախմբումով կարողանալ գտնել այնպիսի լուծում, որը երկրի համար լավագույնն է:
«Մենք նույնիսկ դիմեցինք երկրի նախագահին: Նա հրապարակ եկավ նախաձեռնությամբ, որ նման հարթակ ստեղծվի: Բայց, ինչպես հատուկ է Հայաստանին, շաբաթը ուրբաթից շուտ է գալիս, և ապրիլ 22-ին տեղի ունեցավ Նիկոլ Փաշինյանի, Արարատ Զուրաբյանի և Սասուն Միքայելյանի հայտնի ձերբակալությունը: Երկուշաբթի` երեկոյան ժամը 22:00-ին, պարզվեց, որ հաջորդ օրը` ապրիլի 23-ին, պետք է տեղի ունենա Ազգային ժողովի նիստ, պետք է նրանց զրկեն անձեռնմխելիությունից ու նրանց ձերբակալությունը դառնա մնայուն ձերբակալություն: Ապրիլի 23-ի առավոտյան ժամը 9:00-ին մտել եմ վարչապետ Սերժ Սարգսյանի մոտ և հստակ ասել, որ եթե նման նախաձեռնությամբ խորհրդարան մտնեն, Դաշնակցությունը դեմ է քվեարկելու, չի համաձայնելու այս մոտեցումին: Նա ինձ հարցրել է` ինչո՞ւ, և ես բացատրել եմ, որ սա սրման է տանելու, սա քայլ է, որ մենք գնում ենք դեպի բախում, բախումն արյունահեղությամբ է տեղի ունենալու, և մենք դեմ ենք դրան: Նա ինձ հարցրել է` իսկ ի՞նչ պետք է անենք այս վիճակում: Ասել եմ` նախ` հետաձգիր ԱԺ նիստը, երկրորդ` թույլ տուր հանդիպեմ Նիկոլ Փաշինյանի հետ: Նա դժվարությամբ, բայց վերջում համաձայնել է. ԱԺ նիստը հետաձգվեց, փոխադրվեց այդ օրը` երեկոյան, և ես հանդիպեցի Նիկոլ Փաշինյանի հետ»,- պատմել է Մարգարյանը:
Ներկայացնելով Փաշինյանի հետ բանտում ունեցած իր հանդիպումը` ՀՅԴ Բյուրոյի ներկայացուցիչը նշել է, որ նույնատիպ զրույց ունեցել է նրա հետ: «Ես Նիկոլ Փաշինյանին ասացի, որ մենք չպետք է գին վճարենք, պետք է խուսափենք այս հարցով ազգային գին վճարելուց: Նա փորձեց հասկանալ` ինչի մասին է խոսքը, և ես բերեցի նույն Ուկրաինայի, Վրաստանի օրինակը: Ասացի, որ մենք այլ ճանապարհով պետք է գնանք, որովհետև հանգուցալուծումը հստակ է, բայց գին չպետք է վճարենք: Վերջին հաշվով` 28 տարվա անկախության այս շրջանում, հազար ու մի զրկանքներով, դժվարություններով, ճնշումներով հանդերձ, ազգային մակարդակների վրա ունեցել ենք նաև ձեռքբերումներ և դրանք չպետք է վտանգեինք ինչ-ինչ պատճառներով»,- շեշտել է Մարգարյանը:
Նրա խոսքով` Փաշինյանի` բանտից դուրս գալուց հետո արդեն «իրավիճակ էր փոխվել», և Սերժ Սարգսյանը որոշել էր մի կողմ քաշվել ու առիթ տալ Կարեն Կարապետյանին:
«Համենայն դեպս` ուրախ եմ, որ Հայաստանում արյուն չթափվեց, բախում տեղի չունեցավ, մենք գին չվճարեցին, բայց գին չվճարելու մեր ճիգն ու ջանքը դեռ շարունակվում է: Հուսամ` բոլորս, անկախ կուսակցական պատկանելությունից, կունենանք այն գիտակցությունը, որ մեր երկիրը ղեկավարենք այնպես, մեր գործերը դասավորենք այնպես, որ չպարտավորվենք գին վճարել: Այդ գինը վճարելու իրավունքը մենք չունենք»,- ասել է Մարգարյանը:
Դիտարկմանը, որ կալանավայրում այդ հանդիպման մասին հայտնի է հասարակությանը, բայց Մարգարյանն առաջին անգամ է բացում փակագծերը, նա արձագանքել է, որ այդ ընթացքում հարյուրավոր հանդիպումներ է ունեցել, այդ թվում` Նիկոլ Փաշինյանի հետ, սակայն հանդիպումների մանրամասները չի բացահայտել, քանի որ համարել է էթիկայի նորմերից դուրս:
«Քաղաքական մարդիկ կարող ենք հանդիպել, զրուցել, կարող է շատ կարևոր հանդիպումներ լինեն պատմության համար, բայց օրվա պահով այն կարող է այլ մեկնաբանություններ ունենալ, որ էժանացնում է ամեն ինչ: Ես մինչև հիմա չեմ գնացել այդ ճանապարհով, չեմ խոսել, բայց նաև նկատել եմ, որ չարաշահվում է: Ես հրապարակում չեմ եղել, մյուսը եղել է, մեկը ջուր է բաժանել, մեկը չգիտեմ, թե ինչ է արել, մենք ո՞ւր էին այդ ժամանակ: Այնպես չէ, որ մենք տանն էինք կամ պասիվ դերակատարություն ենք ունեցել: Հակառակը` շատ ակտիվ դերակատարություն ենք ունեցել: Ես կարծում եմ, որ մայիսի 7-ը հասունացնելու առումով մեր դերակատարությունը շատ կարևոր է եղել: Մայիսի 7-ը անարյուն հաջողեցնելու առումով մեր դերակատարությունը բավական կարևոր է եղել»,- ընդգծել է Հրանտ Մարգարյանը:
Հրանտ Մարգարյանը պատասխանել է հարցին, թե իշխանափոխությունից հետո, բացի իշխանության փոփոխությունից, ժողովրդի կյանքում որևէ փոփոխություն տեսնո՞ւմ է, թե՞ ոչ:
«Կա դրականը, և կա բացասականը: Դրականն այն է, որ հույս կա, որ պետք է մի բան փոխվի: Հույս կա, որ վիճակը պետք է լավանա: Սա, իհարկե, թե’ շատ լավ է, թե’ շատ վտանգավոր է: Վտանգավոր է առաջին հերթին իշխող ուժի համար. նա պարտավոր է բավարարել ժողովրդի սպասելիքները: Եթե չկարողացավ դա անել, հուսախաբության ալիքը շատ մեծ է լինելու: Ես սրտանց չեմ ուզենա, որ դա լինի, որովհետև մեր ժողովուրդը մեղք է, քանիերո՞րդ անգամ պետք է հուսախաբվի»,- ասել է Մարգարյանը` նշելով, որ այսօրվա փաստերը, սակայն, թույլ չեն տալիս, որ այդպես մտածենք:
«Բոլոր նախկին գյուղապետերը, դպրոցների տնօրենները, պետական պաշտոնյաները սարսափած վիճակում են, որ ամեն վայրկյան կարող է իրենց դեմ գործ հարուցվել, ամեն վայրկյան կարող է իրենց տուգանեն, բանտարկեն: Այս վիճակը մեր երկրին ձեռնտու չէ»,- հավելել է Բյուրոյի ներկայացուցիչը` շեշտելով, որ խոսքը մեծ կոռումպացվածների մասին չէ. «Խոսքս հակաօրինական գործունեություն ծավալած մարդկանց մասին չէ, այլ շարքային անձանց, որոնք ինչ-որ պայմանների բերումով, գուցե` հաճախ նաև պարտավորված, արել են անօրինականություններ: Նրանց այս ձևով սարսափի մեջ պահել, ահաբեկված պահել, ասել` եթե այսպես չանես, մենք գործ կհարուցենք, այս մթնոլորտը մեզ ձեռնտու չէ: Մարդիկ չասեն էլ, մտածում են, որ կարող է այդպես լինել: Սա մեր երկրի բարոյահոգեբանական մթնոլորտի համար ճիշտ չէ: Այս ժողովրդական շարժումը պետք է այնքան մեծահոգի լինի, որ շարքային ընթացիկ երևույթները մենք ներենք, կարմիր գիծ քաշենք և նորից սկսենք»,- ասել է Մարգարյանը:
Նրա խոսքով` թեև այսօրվա հոգեբանական մթնոլորտում կկարողանանք անօրինականության, կոռուպցիայի դեմն առնել, բայց եթե հարցերին հիմնական լուծում չտանք, դրանք անխուսափելիորեն կրկնվելու են: «Կոռուպցիան մի բան չէ, որ մարդը միշտ գայթակղություն ունենա դա անելու: Եթե մարդն ունի ապահով կյանք, արժանապատիվ կյանք, երբեք դա չի վտանգի` կոռուպցիայի ճամփով գնալու համար: Եթե անգամ վտանգողներ լինեն, տոկոս չեն կազմի, շատ քիչ կլինեն: Բայց եթե մի բան համատարած է լինում, նշանակում է` երևույթ է, որ պատճառներն ունի, և պատճառները պետք է վերացնել, որպեսզի երկիրը երկիր դառնա, և երկիրը դուրս բերենք այս աննորմալ վիճակից: Ես գիտեմ, որ մարդիկ այսօր իսկապես սարսափած են, վախեցած են, և գուցե մարդկանց ձեռք է տալիս, որ ժողովուրդն առայժմ շարունակի հենց այս ձևով ապրել»,- կարծիք է հայտնել Մարգարյանը:
Անցած ժամանակը ցույց տվեց, որ մենք իսկապես ճիշտ ճանապարհով ենք գնացել: «Այսինքն` եթե լիներ նախկին Սահմանադրությունը, երկու բան անխուսափելի կլիներ Հայաստանում` գունավոր հեղափոխությունն արդեն իրականացված կլիներ, և մենք կունենայինք ազգային մեծ կորուստներ, ու անպայման արյունահեղություն կլիներ: Խորհրդարանական համակարգը կանխեց դա, որովհետև այն ելք է ցույց տալիս առճակատումների պահերին»,- ասել է ՀՅԴ Բյուրոյի ներկայացուցիչ Հրանտ Մարգարյանը:
Նրա խոսքով` հենց այդպես էլ եղավ: «Իշխող ուժը չմտածեց, որ ինքը կորցնում է ամեն ինչ, տեսավ, որ խորհրդարանով կարող է ինչ-որ բան վերահսկել: Հենց սա փրկեց երկիրը, որպեսզի արյունահեղություն տեղի չունենա: Ոչ ոք թող իրեն առանձնապես չվերագրի սա` ո’չ մենք, ո’չ ընդդիմությունը, ո’չ էլ իշխանությունը: Մեր երկիրն ունեցավ լուրջ հաջողություն, և ես դա բոլորի հաշվին եմ դրական արձանագրում, բայց պետք է արդար լինենք և խոստովանենք` խորհրդարանական համակարգն էր, որ հնարավորություն տվեց չգնալու արյունահեղության ճանապարհով: Սա ամենամեծ ձեռքբերումն է, որ մենք ունեցել ենք: Դրա համար պետք է պատմությունը շնորհակալ լինի նաև մեզնից, որ խորհրդարանական համակարգը ստեղծեցինք»,- ասել է Մարգարյանը:
Ըստ նրա` ՀՅԴ-ին հաճախ ասում են` խորհրդարանական համակարգ ստեղծեցիք, որ Սերժը երրորդ անգամ թեկնածություն դնի: «Մենք դեռ 1991 թվականից ենք խորհրդարանական համակարգ պահանջել, այն ժամանակ ո’չ Սերժ Սարգսյան կար, ո’չ էլ մեկը գիտեր, որ մի օր հայտնվելու է նման մարդ, որ դառնա երկրի նախագահ, հետո` վարչապետ: Մենք միշտ խորհրդարանական համակարգ ենք պահանջել, և մեր պահանջը եղել է այդ կառուցվածքային փոփոխությունը: Երբեք դա անձնավորված պահանջ չի եղել, այլ` սկզբունքային հարց: Մենք նաև Առաջին հանրապետությունն ենք ղեկավարել, որը նույնպես խորհրդարանական է եղել: Սա մեզ համար եղել է սկզբունքի հարց, և այսօր ես հոգեկան, բարոյական առումով նաև գոհ եմ այն իմաստով, որ դա մեր երկիրը փրկեց արյունահեղությունից»,- նշել է ՀՅԴ Բյուրոյի ներկայացուցիչը:
Մարգարյանի խոսքով` ցանկացած երկրում խորհրդարանը առողջ է, եթե ներկայացնում է հասարակության բոլոր շերտերը: «Բոլորը այնտեղ են կարողանում իշխել, քննարկել, այնտեղ են քվեարկում, օրենքներ ընդունում: Հասարակությունը պետք է ներկայացված լինի խորհրդարանում: Ընդունենք, որ այսօրվա պահն այդ հարմար պահը չէ, մի փոքր տարբեր պահ է. կա բարձրացած ալիք, այդ ալիքի վրա հայտնված մարդ, որն ունի մեծ ժողովրդականություն, և այդ անձով է պայմանավորված, ոչ թե նրա թիմով, ոչ էլ` անձի ներկայացրած գաղափարախոսությամբ կամ ծրագրով: Անձի նկատմամբ համակրանք է, և որքան Էլ հարգելի լինի այդ համակրանքն ու վստահությունը, մի բան պարզ է` դա ո’չ ծրագիր է, ո’չ թիմ է, ո’չ գաղափարախոսություն է, ո’չ քաղաքական ուղեցույց է: Դա մեկ անձ է, որ եկել է որոշ հոգեբանական մթնոլորտի մեջ` անցյալը մերժելու, բայց դեռ հստակ չէ այն ապագան, որ ուզում է կերտել: Այն 70-80 հոգին, որոնց Նիկոլ Փաշինյանն ուզում է բերել խորհրդարան (չեմ ուզում երբևէ մեկի մասին անհարգալից խոսք ասել, հանկարծ այդ տպավորությունը չթողնեմ), բայց կենսագրություն չունի, նրանք արած գործ չունեն, վաստակ չունեն, ճանաչողություն չունեն, որ ասենք` դրանց պատճառով նրանք վաղը կարող են հայտնվել խորհրդարանում»,- նշել է Մարգարյանը:
Նրա խոսքով` մի պատճառ կա, որ նրանք կարող են հայտնվել խորհրդարանում` այդ անձանց անունը կլինի Նիկոլ Փաշինյանի անվան կողքին: «Սա վտանգավոր է, որովհետև խորհրդարանն այն տեղն է, ուր իշխանությունը պետք է կարողանա ինքն իրեն հավասարակշռել, կարգավորել և հակակշռել: Այնտեղ պետք է լինեն գիտակ մարդիկ: Ես չեմ խոսում այն մասին, որ նախկինում այդպիսին էր խորհրդարանը, ես խոսում եմ, թե ինչպիսին պետք է լինի խորհրդարանը: Դրանք տարբեր բաներ են: Որևէ մեկը չկարծի, որ ես ասում եմ` նախորդ խորհրդարանն իդեալական էր: Ո՛չ: Բայց այն, ինչ ուզում ենք ստեղծել, պետք է անպայման լավը լինի, չէ՞: Կարող անձերով պետք է լավը լինի, վաստակ ունեցող մարդկանցով պետք է լավը լինի: Այդ վաստակը կարող է լինել երկու գրքի հրատարակություն: Տարբեր ձևերով այն կարող է ձեռք բերվել: Այլապես` շինծու բան է ստացվում. մեկն իր հետևից քարշ է տալիս 70 հոգու, որոնց ժողովուրդը չի ճանաչում»,- նշել է Բյուրոյի ներկայացուցիչը:
Ինչ վերաբերում է ընտրությունները դեկտեմբերին անցկացնելուն, Հրանտ Մարգարյանն ասել է, որ իր համար անհասկանալի էր, թե ինչո՞ւ հենց դեկտեմբեր որոշվեց: «Կարծեմ` Նիկոլ Փաշինյանն այնքան ժողովրդականություն ուներ, որ եթե ընտրությունը մարտին էլ լիներ, չպետք է շատ տուժեր: Այն խորհրդարանը, որ մենք ունենալու ենք, տա Աստված, որ ես սխալվեմ, բայց չունեմ այնքան տվյալ` ասելու, որ դա կլինի մեր ուզած, ժողովրդի ուզած խորհրդարանը»,- նշել է նա` այնուամենայնիվ, հավելելով, որ որակյալ խորհրդարանը բխում է բոլորի շահերից:
Անդրադառնալով նաև նորաստեղծ կուսակցություններին` Մարգարյանն ընդգծել է, որ կուսակցություն ստեղծելը կատակ չէ, դժվար է: «Մեզ նման փորձառու կազմակերպության մեջ անգամ լինում է պահ` հուսախաբ են անում մարդուն: Եթե կուսակցական են, նշանակում է` կիսում են այդ կուսակցության գաղափարախոսությունը, քաղաքական ուղեգիծը: Եթե մեզ համար դժվար է, նորաթուխ կուսակցությունների համար կրկնակի դժվար է»,- ասել է նա:
Մարգարյանը հավելել է, որ կցանկանար կուսակցությունների ներկայացրած ցուցակներում ավելի լինեին մտավորականները` գիտնականները, համալսարանների դասախոսները, և որակյալ ուժ գնար խորհրդարան: «Բայց ինչ-ինչ պատճառներով նախընտրեցին այն, ինչ կուսակցություններն ունեն այսօր»,- եզրափակել է Բյուրոյի ներկայացուցիչը:
Հրանտ Մարգարյանն անդրադարձել է Բելառուսի ԱԳՆ խոսնակի աղմկահարույց արձագանքին Նիկոլ Փաշինյանի հայտարարությանը:
«Բելառուսի ու Ղազախստանի պահվածքն այնքան տգեղ էր, որ մենք պետք է կարողանանք ազգովի կեցվածք ցուցաբերել: Մենք փոքր ժողովուրդ ենք, փոքր երկիր ենք, մեր առավելությունը մեր միասնականության մեջ է: Մենք պետք է պաշտպանենք մեր երկիրը, մեր երկրի արժանապատվությունը»,- ասել է նա:
Մարգարյանի խոսքով` կա այս հարցի մյուս կողմը: «Քաղաքականությունը, դիվանագիտությունն այն զենքն է, որով պետք է կարողանանք շրջանցել կոնֆլիկտները, անգամ` հակառակորդների հետ հարաբերության մեջ, էլ ուր մնաց, այսպես ասած, կիսաբարեկամական կամ բարեկամական երկրների նկատմամբ: Եթե մենք չենք կարողանում այդ քաղաքականությունն ու դիվանագիտությունն այնպես օգտագործել, որ կարողանանք շրջանցել կոնֆլիկտները, ուրեմն մտածելու բան ունենք` որտե՞ղ ենք թերություն ունեցել, որտե՞ղ է, որ պետք է փոփոխություն ապրենք: Ղազախստանն ու Բելառուսը պետք է տեսնեն` մենք մեկ ու միասնական կեցվածք ունենք: Դա է ճիշտը, որը պետք է պահենք ու պահպանենք»,- շեշտել է Մարգարյանը:
Ժողովուրդն իր քվեարկությամբ է որոշում` ով է ընդդիմություն, ով` իշխանություն. ասել է Հրանտ Մարգարյանը` պատասխանելով հարցին, թե ինչպե՞ս է որոշվում` ընդդիմությո՞ւն են, թե՞ իշխանություն:
Ըստ նրա` ում ժողովուրդը շատ ձայն է տալիս, դառնում է իշխանություն, մնացածը, որ մաս չեն կազմում կառավարությանը, լինում են ընդդիմություն: «Այդ բաժանումն այնքան պարզ է: Հիմա` եթե ասում են` չէ, միայն մենք ենք ընդդիմությունը, սովոր են ինչ-որ բան մոնոպոլիայի վերածել: Բայց ինչ-որ առումով ճիշտ են ասում` մենք նրանց նման ընդդիմություն չենք լինի, մենք մեր նման ընդդիմություն կլինենք»,- ասել է Մարգարյանը:
Նա նշել է, որ Փաշինյանը կունենա քվեների մեծամասնությունը և կառավարություն կձևավորի: «Մենք, ուզենք, թե չուզենք, ընդդիմություն ենք լինելու: Բայց մի բան էլ պարզ է` ամեն կուսակցություն իր նման, իր ձևով, իր արժեհամակարգով, իր քաղաքական ուղեգծով, պետականության նկատմամբ ունեցած իր պատկերացումով, ազգի պայքարի մասին ունեցած իր պատկերացումով և հեռանկարով է ընդդիմություն լինելու: Մենք մեզ նման` Դաշնակցության նման ընդդիմություն ենք լինելու, նրանք էլ` Հանրապետականի նման: Բայց ասել, որ միայն մենք ենք, ծիծաղելի է»,- շեշտել է Մարգարյանը:
Ինչո՞ւ պիտի ընտրենք Դաշնակցությանը, և ինչպե՞ս եք գնահատում ձեր հնարավորությունները. հաղորդման ժամանակ քաղաքացիներից մեկն այս հարցն էր ուղղել Հրանտ Մարգարյանին:
«Շատ են պատճառները, բայց այսօրվա իրականության մեջ երկու հիմնական պատճառ կա: Նախ` ազգայինը. այսօր մտահոգություն կա ազգային արժեհամակարգի, ազգային ծրագրերի, ազգային մտածողության, ազգային դաստիարակության, մշակույթի պահպանման, հայկականն ունենալու խնդիր: Դա մարմնացնում է Դաշնակցությունը»,- պատասխանել է Մարգարյանը: Նա նշել է, որ այսօրվա հակադաշնակցական արշավներին ինքը ծիծաղով է վերաբերվում:
«Իրենց այնպես են պահում, որ եթե ՀՅԴ-ն ընդհանրապես գոյություն չունենար, հակադաշնակցականությունը դեռ գոյություն կունենար, որովհետև նրանք Դաշնակցությանը դեմ չեն` որպես կուսակցություն, նրանք Դաշնակցության արժեհամակարգին են դեմ: Եթե դեմ են եկեղեցուն, ուրեմն դեմ են Դաշնակցությանը: Եթե դեմ են Արցախին, ուրեմն դեմ են Դաշնակցությանը: Եթե դեմ են Հայ Դատին, Հայոց ցեղասպանության միջազգային ճանաչմանը, Արևմտահայաստանի ազատագրմանը, ուրեմն դեմ են Դաշնակցությանը: Եթե դեմ են Ջավախքին, ուրեմն դեմ են Դաշնակցությանը: Այսքան պարզ է»,- նշել է Մարգարյանը` շեշտելով, որ պետք է ընտրել Դաշնակցությանը, որպեսզի ազգայինը պահպանվի:
Բյուրոյի ներկայացուցիչը նշել է, որ իրենք տարբեր դիրքորոշումներ են ունեցել, բայց երբ ազգայինը վտանգվել է, կարողացել են ըմբոստանալ, իրենք իրենց գերազանցել: Նա հիշեցրել է նաև, որ երբ հայ-թուրքական արձանագրությունների հարցը բարձրացավ, ՀՅԴ-ն գերազանցեց ինքն իրեն:
«Մենք ժամանակի ամենամեծ շարժումը սկսեցինք հայկական իրականության մեջ: Երբ Լևոն Տեր-Պետրոսյանի ժամանակ էլ Արցախի հարցով նահանջ արձանագրեցին, նույնն արեցինք»,-ասել է Մարգարյանը` նշելով, որ այսօր էլ կան նույն մտահոգությունները: Նրա խոսքով` առաջին հայացքից թվում է` լավ բան է տեղի ունենում: Արցախի հարցով սկզբունքային դիրքորոշումներ են հայտնվում, հաճախակի այցելություններ են լինում, թվում է` բանի պակաս չկա, Դաշնակցության տեսակետները գրեթե կրկնվում են:
«Մտածում ես` լավ է ամեն ինչ, մեկ էլ տեսնում ես` ազատագրված տարածքների հարցով կարծիք չի հայտնվում: Ասում է` դա պետք է որոշի ժողովուրդը: Միշտ էլ ժողովուրդը պիտի վերջին խոսքն ասի, բայց եթե քաղաքական ուժը չի ասում` ո՞րն է իր տեսակետը, որ դրանից հետո դնի ժողովրդի դատողության, դա վտանգավոր է: Նշանակում է` երկու բևեռ կա հայկական իրականության մեջ: Մի բևեռն ասում է` ոչ մի զիջում, մյուս բևեռն ասում է` տարածքներ` խաղաղության դիմաց: Հիմա էլ հայտնվել է մեկը, ով ասում է` արի գնանք, հայտնվենք մեջտեղում, ասենք` ժողովուրդը պետք է որոշի` տարածքները տա՞նք, թե՞ չտանք, հետո կորոշենք մյուսը: Սա մտահոգիչ է: Կարող է ոչ մի բան չկա, ես չեմ ուզում ժամանակից առաջ ընկնել, բայց մթնոլորտը լեցուն է մտահոգություններով»,- ասել է Մարգարյանը` հավելելով, որ ազգային հարցերի, արժեքների, արժեհամակարգի խնդիր ունենք այսօր:
Ինչ վերաբերում է Դաշնակցությանն ընտրելու երկրորդ պատճառին, նա ասել է. «Երկրորդը` սոցիալական անարդարությունն է: Դաշնակցությունը ազգային կուսակցություն է, հավատացած է, որ մենք ազգային պայքար ունենք, ազգային հեռանկար ունենք: Հավատացած է, որ մենք ազգային երազանք ունենք, մեր ժողովուրդը պետք է համախմբված լինի մեր պետականության շուրջ: Իսկ որպեսզի մեր ժողովուրդը համախմբված լինի մեր պետականության շուրջ և մենք կարողանանք միասնաբար այս պայքարն առաջ տանել, պետք է սոցիալական արդարություն լինի, մեր ժողովրդի մեջ աղքատություն չպետք է լինի, հայ մարդը չպետք է աղքատ լինի: Սա մեր համոզումն է, էությունը, և սա չի բխում միայն մեր սոցիալիզմից: Մեր սոցիալիզմը բխում է մեր ազգային իրողությունից: Մեր ազգը պետք է կարողանա միասնական լինել, իսկ դրա համար պետք է նրա մեջ արդարություն հաստատված լինի: Որպեսզի արդարություն հաստատվի, պետք է աղքատ չլինի, ճնշում չլինի, զրկանք չլինի, անգործ մարդ չլինի: Սրանք մեզ համար ծրագրեր են, մենք ծրագիր ունենք: Բոլոր մյուս ուժերը լիբերալ համակարգի կողմնակից են, անցյալի ուժերն էլ են այդպես, ներկայինն էլ, ապագայի մասին խոսողներն էլ լիբերալ համակարգի կողմնակից են: Իսկ մենք` ոչ, մենք ասում ենք սոցիալական տնտեսական համակարգ պետք է ստեղծվի երկրում: Այն, ինչ Սահմանադրությունն է ասում, բայց մոռացվում է»,-եզրափակել է Մարգարյանը:
«Նորընտիր քաղաքապետը երդման օրը հիշեց, որ 20 տարի ամեն ինչ թանկացել է, բացի տրանսպորտից, հիմա եկել և ասում է, որ կարմիր գծերը պետք են: Ի՞նչ կարծիք ունեք»,-Հրանտ Մարգարյանին այս հարցն է ուղղել մի թոշակառու:
«Ես, որ ասում էի` կլինենք ընդդիմություն, բայց մեր` Դաշնակցության նման ընդդիմություն, սրա մասին էր խոսքը: Հարցն այն է, որ ընդդիմությունն անպատասխանատվություն չէ: Ես կամաչեմ, եթե հիմա մի բան ասեմ, վաղը իշխանության գամ ու չկարողանամ դա անել: Ուղղակի կամաչեմ, այլ բան չասեմ: Դա բարոյական հասկացություն է: Հիմա կասեն` քաղաքական գործիչն ի՞նչ կապ ունի բարոյականության հետ: Հավանաբար, սովորական քաղաքական գործիչները կապ չունեն բարոյականության հետ, բայց եթե գաղափարական մարդ ես, ինչ-որ արժեքների հավատում ես, դու չես կարող էժան քարոզչությամբ փորձել ժողովրդականություն շահել»,- պատասխանել է Հրանտ Մարգարյանը:
Նրա խոսքով` նման երևույթներ միշտ եղել են, ամեն տեղ էլ լինում են, բայց դաշնակցականի տեսակը դա չի կարող ընդունել: «Ես պետք է քննադատեմ այնպես, պահանջեմ այնպես, որ վաղը կարողանամ դա իրագործել: Մեր կուսակցությունը պիտի ասի այն, ինչ կարող է հետո գործադրել, իրականացնել»,- նշել է ՀՅԴ Բյուրոյի ներկայացուցիչը:
Նախկին դաշնակցականներն ավելի շատ են, քան ներկայիս դաշնակցականները, բայց ես դա բնական եմ համարում. ասել է Հրանտ Մարգարյանը:
«Մեր կուսակցությունը դժվար կուսակցություն է, այստեղ դիմանալը դժվար է: Այս կուսակցության մեջ կա ժողովրդավարություն և կարգապահություն: Մեծամասնության կարծիքի հետ դու պետք է համակերպվես: Մեծամասնության կարծիք է ձևավորվում, այդ մեծամասնության կարծիքը ձևավորելու մեջ դու ամեն ինչ կարող ես անել, որ այդ մեծամասնությանը մաս կազմես: Բայց եթե չկազմեցիր, փոքրամասնության մեջ եղար, որոշումներին ենթակա ես»,- ասել է Հրանտ Մարգարյանը:
Նրա խոսքով` Հայաստանում մարդիկ ընդհանրապես մեծ տարիքում են եկել դեպի Դաշնակցություն, և բնական է, որ հետո են անդրադարձել` այդ կարգապահությունն իրենց համար շատ է, չեն դիմացել դրան:
«Հաճախ մեզանից գնում են` առանց մեզ հակադրվելու, բայց պատահում է նաև, երբ զգում ենք` մարդը թյուրիմացաբար է մեր մեջ եղել: Օրինակ` հիմա մեզանից հեռացած մարդիկ կան, որ այն տեսակ ուղղությունների հետևից են գնում, որ «ռուսական բազաները Հայաստանից դուրս պիտի դրվի, մենք պիտի գնանք դեպի ՆԱՏՕ», այսպիսի բաներ են ասում, որը Դաշնակցության քաղաքական ուղեգծի հետ կապ չունի: Մենք հավատում ենք հայ-ռուսական ռազմավարական դաշինքին, մենք հավատում ենք, որ պետք է ստեղծվի հավասարը հավասարին հարաբերություն, մեր ազգային շահերից ելնելով` պետք է կարողանանք ճիշտ հարաբերություններ ստեղծել: Մենք ունենք ազգային անվտանգության խնդիր, և դրա համար այդ հարաբերությունները մեզ համար շատ կարևոր են: Մենք հասկանում ենք, որ ջրանցումի ժամանակ ձիերը չեն փոխում: Եթե մարդիկ ժամանակին համոզված են եղել ու եկել են Դաշնակցություն, ես չեմ հասկանում, թե ինչպես է համոզումը փոխվել: Իսկ եթե համոզված չեն եղել, չեն անդրադարձել, սխալմամբ են եկել, ավելի լավ է, որ հիմա ՀՅԴ-ի մեջ չեն»,- շեշտել է ՀՅԴ Բյուրոյի ներկայացուցիչը:
Նրա խոսքով` Դաշնակցությունից հեռացած մարդկանց պետք է երկու մասի բաժանել: «Մարդիկ, որոնք Դաշակցության անդամ չեն այլևս, բայց դաշնակցական են` մտայնությամբ, մոտեցումներով, հոգեկան ապրումներով, ամեն ինչով: Ես նրանց նկատմամբ հարգանք ունեմ: Եվ մարդիկ, որ ՀՅԴ-ի մեջ չեն` արդեն գաղափարական այլ ուղղության մեջ հայտնվելու համար, նրանց համար էլ է լավ, կրկնակի` մեզ համար էլ»,- ասել է Մարգարյանը:
Ըստ նրա` հիմա շատերը, որ կուսակցություն են ստեղծում, փնտրում են նախկին դաշնակցականների, ինչը, ըստ նրա, նույնպես բնական է, քանի որ այդ մարդիկ, վերջիվերջո, կազմակերպվածություն, կազմակերպական գործի մասին պատկերացում ունեն: «Ես դրան խանդով չեմ վերաբերվում»,- ասել է ՀՅԴ Բյուրոյի ներկայացուցիչը:
Հաճախ հնչեցվող հարցը, թե ինչո՞ւ ՀՅԴ-ն կոալիցիա կազմեց Հանրապետական կուսակցության հետ, քաղաքացիներից մեկը հաղորդման ժամանակ ուղղել է նաև ՀՅԴ Բյուրոյի ներկայացուցիչ Հրանտ Մարգարյանին:
«Մեզ մեղադրում են` ասելով` ինչո՞ւ Սերժ Սարգսյանի թեկնածությունը պաշտպանեցիք: Սերժ Սարգսյանը առաջին անգամ թեկնածու է եղել 2008 թվականին: Այդ թվականին մենք ունեցել ենք Վահան Հովհաննիսյանի թեկնածությունը, և մենք պաշտպանել ենք նրա թեկնածությունը, ոչ թե` Սերժ Սարգսյանի: Երկորդ անգամ Սերժ Սարգսյանը թեկնածու է եղել 2013 թվականին: Մենք այս ժամանակ թեկնածու չենք ունեցել, բայց հայտարարությամբ ենք հանդես եկել` ասելով` չքվեարկեք իշխանության թեկնածուի օգտին, կքվեարկեք ընդդիմության թեկնածուներից որևէ մեկին: Այդ ժամանակ էլ չենք պաշտպանել նրա թեկնածությունը: Իսկ երրորդ անգամ, երբ վարչապետ առաջադրվեց, դրա նախօրեին ինքս առնվազն երկու-երեք անգամ հայտարարել եմ, որ մենք կարող էինք պաշտպանել միայն դաշնակցական թեկնածուի թեկնածությունը: Հարց են տվել` եթե Հանրապետականը ուրիշ թեկնածու ներկայացնի, դուք կընդունե՞ք: Ասել եմ` նորը միշտ նախընտրելի է: Սրանից ավելի մարդկային լեզվով չի կարելի ասել, թե ինչ է մեր դիրքորոշումը» պատասխանել է Մարգարյանը:
Նա ներկայացրել է Սերժ Սարգսյանի հետ համագործակցության նպատակները:
«Մենք համագործակցել ենք Սերժ Սարգսյանի հետ, ես դրա ուրացողը չեմ: Եվ, ընդհանրապես, ուրացող մարդիկ լավ մարդիկ չեն: Համագործակցել ենք 2008 թվականին, երբ Մարտի 1 էր եղել, Ղարաբաղում առաջին անգամ տարածք էինք կորցրել, Հայաստանը Մարտի 1-ի պատճառով աշխարհով մեկ վարկաբեկված ու խայտառակված էր, և շատ դժվար էր այդ պայմաններում ներկայանալ միջազգային ասպարեզում: Մենք նախագահական ընտրություններից նոր էինք դուրս եկել, վիրավոր էինք դուրս եկել, որովհետև մեր թեկնածուն պարտվել էր և ակնհայտ ընտրախախտումների արդյունքում էր պարտվել: Շատ դժգոհ էինք, բայց այդ պայմանների մեջ զգացինք` ճիշտը կոալիցիային մասնակցելն է, որպեսզի կարողանանք միասնական ճիգ ու ջանքով երկիրը դուրս բերել այդ վիճակից, այդ խայտառակ իրողությունից»,- նշել է ՀՅԴ Բյուրոյի ներկայացուցիչը:
Նրա խոսքով` կոալիցիա կազմելն ինքնանպատակ չի եղել, և, բացի իրենց նպատակներից, իրենց այնտեղ պահող այլ բան չի եղել: Դրա մասին վկայում է այն, որ երբ Սերժ Սարգսյանը ստորագրեց հայ-թուրքական արձանագրությունները, ՀՅԴ-ն դուրս եկավ կոալիցիայից:
«Երբ Սերժ Սարգսյանը ստորագրեց հայ-թուրքական արձանագրությունները, մենք մի վայրկյան անգամ չհապաղեցինք, անմիջապես դուրս եկանք կոալիցիայից: Ոչ մի բան չկար, որպեզի մեզ պահեր այնտեղ: Ոչ մի տկար տեղ չունեինք, որպեսզի մեզ դրանով պահեին: Վայրկյանապես դուրս եկանք, որովհետև մենք պահել էինք մեր ինքնուրույնությունը, մեր անկախությունը, մեր արժանապատվությունը: Սա շատ կարևոր է»,- ընդգծել է Մարգարյանը:
Նա պատմել է, որ յոթ տարի ՀՅԴ-ն Սերժ Սարգսյանին ընդդիմություն է եղել: Ըստ Մարգարյանի` շատեր հիմա մոռացել են, որ այդ տարիները միակ տարիներն էին Հայաստանի քաղաքական պատմության մեջ, որ ընդդիմությունը համախմբվեց:
«Այդ ժամանակ խորհրդարանական քառյակ ստեղծվեց: Դա ստեղծվեց մեր շուրջ, և մենք հասանք վարչապետի հրաժարականին: Բայց երբ դուրս եկանք այդ քառյակից, այն փլվեց: Հիմա ասում են` դուք գալիս եք այս կողմ, գնում եք այն կողմ, այնտեղից` մյուս կողմ: Ո՛չ, մենք մեր տեղում կանգնած ենք, նրանք են կպչում մեզ: Սկզբում ընդդիմությունն ընդունեց մեր յոթ կետերը, որ հայտարարել էինք, նրանց հետ համագործակցեցինք: Հետո իշխանությունն ընդունեց մեր յոթ կետերը, նրանց հետ համագործակցեցինք: Համագործակցել ենք ոչ թե թալանի մեջ, ոչ թե կողոպուտի մեջ, ոչ էլ ունեցել ենք նրանց արտոնյալ կարգավիճակն այս երկրում: Այս երկրում ոչ մի մենաշնորհ չկա, որ որևէ դաշնակցականի լինի:
Հիմա կասեն` չեն տվել, դրա համար չի եղել: Չեն տվել, որովհետև յուրային չեն համարել: Բայց այդ ընթացքում մենք ունեցել ենք Հայոց ցեղասպանության 100-րդ տարելիցի հռչակագիրը, հաջողեցրել ենք հայ-թուրքական արձանագրությունների չեղարկումը, հաջողեցրել ենք, որ Արցախի քաղաքականության մեջ հիմնական բեկում մտնի` Մադրիդյան սկզբունքներից վերջապես պոկվենք և գանք, կանգնենք այն սկզբունքի վրա, որ քանի դեռ Ադրբեջանը չի ճանաչել Արցախի ժողովրդի ինքնորոշման իրավունքը, մենք նրանց հետ բանակցելու բան չունենք: Սրանք մեր ձեռքբերումներն են եղել: Ձեռքբերումներ, որոնք կուսակցության շահով պայմանավորված չեն եղել, ազգային շահով են պայմանավորված եղել»,- շեշտել է Մարգարյանը:
ՀՅԴ Բյուրոյի ներկայացուցիչը նաև ընդգծել է, որ այդ ընթացքում սոցիալ-տնտեսական հարցերով իրենք միշտ ելույթներ են ունեցել: Անգամ այն ժամանակ, երբ կոալիցիայի մաս են եղել, ամեն երեք ամիսը մեկ` 2017 թվականի հուլիսին, նոյեմբերին և 2018-ի փետրվարին հայտարարությամբ են հանդես եկել, որում ներքին, պետական համակարգի ախտաճանաչում են արել և լուծումներ առաջարկել:
«Մենք համակերպված վիճակ չենք ունեցել, թալանին չենք մասնակցել: Հակառակն ենք եղել, ասել ենք` անկախ մարմին պետք է լինի, այդ մարմինը պետք է ընդդիմությանը տրվի, ընդդիմությունը պետք է վերահսկի իշխանությանը, դա է ճիշտ ձևը: Այս ամենը մենք ասել ենք, երբ կոալիցիա ենք եղել: Այսօր էլ ենք ասում, բայց ո’չ այն ժամանակ արեցին, ո’չ հիմա են անում: Մեզ համար այդ հարցերը հիմնական հարցեր են»,- նշել է Հրանտ Մարգարյանը` ընդգծելով, որ իրենք չեն առաջնորդվում այս կամ այն դաշնակցականի շահերով, այլ` ազգի և երկրի:
«Սա էժան քարոզչություն չէ, սա մեր էությունն է: Ամբողջ հարցն այն է, որ պետք է կարողանաս զանազանել Դաշնակցությունը մյուսներից: Մենք եղել ենք կոալիցիա, բայց այն մասով ենք համագործակցել, որտեղ այսօր էլ կարող ենք հպարտանալ այդ համագործակցության համար: Մենք վատի, ստի, կեղծիքի հետ չենք եղել»,- ասել է նա` հիշեցնելով նաև սահմանադրական փոփոխությունների մասին, որոնք, ըստ նրա, եղել են իրենց ամենամեծ ձեռքբերումներից մեկը:
«Ես այսպիսի շատ օրինակներ կարող եմ թվարկել, բայց մի քանի օրինակ բերեցի, որպեսզի հասկացվի` մեր համագործակցությունը օդի մեջ չի եղել: Մենք արդյունք ենք ունեցել, որ մերն է եղել»,- ասել է ՀՅԴ Բյուրոյի ներկայացուցիչը:
Նա նաև նշել է, որ այդ ծրագրերն իրականացնելիս ՀՅԴ-ն միայնակ է եղել, ուրիշ ուժ չի կանգնել իրենց կողքին:
«Սրանք մեր օրակարգերն են եղել, մեր ծրագրերն են եղել, և մենք մեր օրակարգերն ենք հաջողեցրել: Մենք ուրիշի ծրագիր չենք հաջողեցրել, ուրիշի ջրաղացին ջուր չենք լցրել: Մենք մեր խնդիրն ենք լուծել` մեր ազգային խնդիրներն ենք լուծել»,- ասել է Հրանտ Մարգարյանը` շեշտելով, որ Հայաստանի անկախության հռչակագրից հետո` Հայոց ցեղասպանության 100-րդ տարելիցի հռչակագիրը ամենամեծ ձեռքբերումն է:
Եթե չանցնեք ԱԺ, որո՞նք է լինելու Դաշնակցության հետագա քայլերը, ունե՞ք ծրագիր. քաղաքացիներից մեկն այս հարցն է տվել ՀՅԴ Բյուրոյի ներկայացուցիչ Հրանտ Մարգարյանին:
Նա, վստահեցնելով, որ ՀՅԴ-ն անցնելու է Ազգային ժողով, ասել է. «Ես հավատում եմ, որ անցնելու ենք, որովհետև կարծում եմ` եթե վիճակը բարդանում է, Դաշնակցությունն ավելի փնտրված է լինում: Այսօր մենք ունենք լուրջ դժվարություններ, մտահոգություններ, իսկ Դաշնակցությունն իսկապես անհրաժեշտ է»,- ասել է Մարգարյանը:
Անդրադառնալով ԱԺ չանցնելու հավանականությանը` նա նշել է, որ ամեն դեպքում Դաշնակցությունը շարունակելու է իր գործը: «Եթե անգամ չանցնենք, կանենք այն, ինչ արել ենք միշտ` զբաղվելու ենք Հայաստանով և հայ ժողովրդով, Հայ Դատի պայքարով: Իշխանությունը մեզ համար երբեք նպատակ չի եղել: Իշխանությունը մեզ համար միջոց է եղել մեր հիմնական նպատակն իրականացնելու համար` ստեղծել անվտանգ պայմաններ և զարգացման հնարավորություններ ժողովրդի համար»,- ասել է Մարգարյանը:
Նրա խոսքով` պետությունը, իշխանությունը միջոց է այդ նպատակին հասնելու, այդ նպատակը երաշխավորելու համար, իսկ Դաշնակցությունը միշտ անելիք ունի: «Մենք Սփյուռքում անելիք ունենք, Հայաստանում անելիք ունենք, Արցախում, Ջավախքում, Արևմտահայաստանում ունենք անելիք: Այնտեղ, որտեղ հայ կա, մենք անելիք ունենք, և այդ անելիքն ինչ-որ զբաղմունք չէ, այլ` հիմնական գործ»,- շեշտել է Մարգարյանը:
Նա նշել է, որ հաճախ իրեն ասում են, որ դասականորեն ՀՅԴ-ն Սփյուռքում եղել է այդ պատճառով: «Լավ, 28 տարվա անկախության ընթացքում բոլորի հետ միասին մենք Հայաստանում աշխատել ենք: Ինչո՞ւ մենք ունեցել ենք կառույց Վրաստանում, Արցախում, Ռուսաստանում, Ուկրաինայում, մյուսները չեն ունեցել: Որովհետև մեզ համար հայ ժողովրդի ամեն մասնիկ արժեք է և նրան կազմակերպել, ներառել հայ ժողովրդի, այսպես ասած, համահայկական ցանցի մեջ մեզ համար ռազմավարական առաջնահերթություն և կարևորություն ունի: Ամեն մաս պետք է բաղկացուցիչ մասը դառնա քո մեծ ուժի: Մենք դա ենք անելու»,-ասել է Մարգարյանը` հավելելով, որ Դաշնակցությունն անելիք ունի այնտեղ, որտեղ հայկական շահ կա, և որտեղ հայկականությունը կարող է վտանգվել:
Նրա համոզմամբ` Դաշնակցությունը չի ստեղծվել, որ իշխանություն դառնա: Այնուամենայնիվ, Մարգարյանը նշել է, որ գուցեև սխալվել են` կոալիցիաների մաս կազմելով` թե՛ Ռոբերտ Քոչարյանի ժամանակ, թե՛ Սերժ Սարգսյանի ժամանակ, թե՛ Նիկոլ Փաշինյանի ժամանակ:
«Որովհետև սկսեցինք քչով բավարարվել, սկսեցինք մեր դերակատարության սահմանները փոքրացնել, այնինչ մենք` որպես կուսակցություն, պետք է փորձեինք հասնել ամբողջական իշխանության: Ես ձեզ ասեմ` այս ընտրությունը մեզ համար դառնալու է այն հենարանը, որից մենք հասնելու ենք ամբողջական իշխանության, որպեսզի կարողանանք արդար Հայաստան ստեղծել, միացյալ Հայաստան ստեղծել, կարողանանք տեր կանգնել ամբողջ հայությանը և հայկականությանը, կարողանանք հայությանը մեկտեղել Հայաստանում: Մենք պիտի կարողանանք մեր ազգային երազանքն իրականացնել: Մենք այդ նպատակով կուզենք իշխանություն լինել, բայց որ չլինենք, աշխարհը չի վերջանա, այլ ձևով կսկսվի մեզ համար»,- ասել է Հրանտ Մարգարյանը:
Որ ղեկավարը գալիս է, սկսում է նախատել սահմանամերձ գյուղերին, թե չեն աշխատում: Ի՞նչ եք մտածում Հայաստանի սահմանամերձ գյուղերի մասին. քաղաքացիներից մեկն այս հարցն ուղղեց ՀՅԴ Բյուրոյի ներկայացուցիչ Հրանտ Մարգարյանին:
«Ես ամբողջ Հայաստանի մասին եմ մտածում, սահմանամերձ գյուղերի մասին` առավել, քանի որ այնտեղ մենք ավելի խոցելի ենք, անտեղ ավելի մեծ դիմադրողականություն պետք է ունենանք: Դրա համար պետք է լինի պետական ծրագիր»,- պատասխանել է նա:
Մարգարյանը համոզմունք է հայտնել, որ զորացրվող երիտասարդին բնակարանով և աշխատանքով ապահովելու դեպքում նա երկրից չեն հեռանա: «Ես հավատացած եմ` ամեն զինվոր, որ ավարտում է զինվորական ժամանակաշրջանն ու զորացրվում, գալիս է դեպի կյանք, պետությունը պետք է նրան տա հնարավորություն, պետք է նրան տա բնակարան, աշխատանքով ապահովի, եթե աշխատել չգիտի, սովորեցնի և աշխատանքով ապահովի: Արտագաղթի դեմն այդպես կառնենք: Թող դա անի Երևանից դուրս` ավաններում, սահամնամերձ շրջաններում, որպեսզի մարդիկ ընտանիք կազմեն, հաստատվեն, գործ ունենան: Էլ ո՞վ կգնա այս երկրից: Ես չեմ հաշվել, բայց գիտեմ, որ շատ մեծ չէ ամեն տարի զորացրվողների թիվը, մենք կարող ենք ազգովի նրանց տիրություն անել: Միայն պետք չէ ասել` չպետք է գնալ, կամ` նախորդները սխալ արեցին, ուղարկեցին նրանց, հարկավոր է ասել մենք այսօր պետք է տիրություն անենք ու պահենք նրանց»,- ասել է նա:
Մարգարյանի խոսքով` այս հարցը մասնավորապես կարևոր է նաև անվտանգության առումով: «Մեր երիտասարդ ուժը պետք է Հայաստանում մնա: Ես նախորդ իշխանություններին էլ, հիմա` նորերին էլ եմ ասել` մենք պետք է մեր պահեստային զորամիավորումներն ունենանք, անհրաժեշտության պահին մենք պետք է կարողանանք համաժողովրդականորեն դուրս գալ պատերազմի: Մենք պատերազմի մեջ ենք գտնվում և շատ երկար սահմաններ ենք պաշտպանելու: Կրկնում եմ` պատերազմից խուսափելու ամենալավ միջոցը պատերազմին պատրաստվելն է: Պատերազմին պատրաստվել` չի նշանակում, թե պատերազմ ենք ուզում: Մենք պատերազմին պիտի պատրաստվենք, որ պատերազմ չլինի: Մենք պետք է կարողանանք խաղաղության մեջ ապրել, բայց խաղաղությունը չեն նվիրում, խաղաղությունը նվաճում են և նվաճում են տղամարդկությամբ»,- նշել է Մարգարյանը:
Նա համոզմունք է հայտնել, որ պետք է երիտասարդություն ունենանք սահմանամերձ շրջաններում, նրանք պետք է ինչ-որ ձևով ներառված լինեն բանակում` համաժողովրդական բանակի սկզբունքներով, պահեստային զորամիավորումների սկզբունքներով: «Նրանք պետք է ունենան իրենց առօրյա, սովորական կյանքը, բայց հարկ եղած դեպքում պետք է բանակային դառնան: Պետք է լինի հստակ ծրագիր: Բոլոր մյուս երկրներում այդպես է եղել: Այն երկրները, որոնք ունեցել են վտանգ, օրինակ` Իսրայելը, ավաններ, գյուղեր են ստեղծել այդպես: Եթե ծրագիր լինի, վստահ եմ` հնարավորություններ էլ կստեղծվեն: Մենք պետք է կարողանանք երկրում այդ մթնոլորտը ստեղծել: Երիտասարդը գնում է, հետևից ընտանիքն է գնում»,- ասել է ՀՅԴ Բյուրոյի ներկայացուցիչը` շեշտելով, որ ծրագրի առկայության դեպքում ոչ ոք չի հեռանա, հեռանալու դեպքում անգամ` նրանց թիվը քիչ կլինի:
Ինչ վերաբերում է հայրենադարձության գործում Դաշնակցության անելիքներին` Հրանտ Մարգարյանը նշել է, որ բոլորն այդ գործում անելիք ունեն: «Բայց դրա համար պետք են պայմաններ, հնարավորություններ, հոգեբանական մթնոլորտը պետք է փոխել: Վերջապես, այս դարում, այս ժամանակներում ներգաղթ կազմակերպելը հեշտ չէ. դա նշանակում է մի տեղ տուն քանդել, մի ուրիշ տեղ տուն ստեղծել: Դա նշանակում է մի տեղ գործը թողնել, մեկ ուրիշ տեղ աշխատանք ձեռք բերել, մեկ այլ հասարակության միջից դուրս գալ և այլ հասարակության մեջ համակերպվել»,- ասել է նա` հավելելով. «Միայն խոսքով ներգաղթ չի լինում»:
Անդրադառնալով սիրիահայությանը` Մարգարյանը նշել է, որ այդ հարցում նույնպես առիթը չեն կարողացել օգտագործել, անգամ Դաշնակցության կողմից նախաձեռնված «Օգնիր եղբորդ» ծրագիրը, նրա խոսքով, միայն բավարար չէր նրանց պահելու համար: «Ես շատերին եմ տեսել, որ կուզեին մնալ Հայաստանում, բայց չկարողացան ապրել: Եվ ոչ ոք չեղավ, որ նրանց ձեռքը բռնի, որ կարողանան ապրել»,- ասել է Մարգարյանը` նշելով, որ բոլոր դժվարություններն ունեն լուծումներ, պարզապես պետք է դրանք կազմակերպել, այլապես` խոսքով հնարավոր չէ մարդկանց կերակրել կամ հարցերին լուծում տալ:
