Նիկոլ Փաշինյանի հետ խոսակցությունը ստացվեց. հույս ունեմ այն կշարունակվի
Posted on April 23, 2018, by admin, under Լուրեր, Հարցազրույցներ, Տեսաերիզներ.
Ես այսօր հաջողեցի հանդիպել Նիկոլ Փաշինյանի հետ, մեր խոսակցությունը ստացվեց եւ հույս ունեմ, որ այն շարունակվի, թեպետ առայժմ կոնկրետ արդյունքներ չկան: Մենք անցած 5-6 օրվա ընթացքում այս տեսակի ծավալուն աշխատանքների մեջ ենք եղել զանազան կողմերի հետ, զանազան անձերի հետ, որպեսզի կարողանանք լուծում գտնել երկրի առջեւ կանգնած այս թնջուկին:
Կարեւորն այն է, որ մենք, իբրեւ Դաշնակցություն, համաձայն չենք ձերբակալությունների հետ, նաեւ դեմ ենք, երբ վերջնագրերով են խոսում: Մենք հավատում ենք, որ անհրաժեշտ է երկխոսություն՝ հանուն այս երկրի ու ժողովրդի: Պետք է մենք կարողանանք սթափվել, առիթ տանք, որ այդ երկխոսությունը տեղի ունենա, որ այդ լուծումը մենք գտնենք ու երկիրը ցնցումների չտանենք:
Կարեւոր է այսօր եւ այս պահին, որ փողոցը շատ ավելի զգույշ լինի, ժողովրդային շարժումը շատ ավելի զգույշ լինի, սադրանքների չենթարկվի, խաղաղ բնույթը պահպանի, որպեսզի հնարավորություն ստեղծենք, որ լուծում գտնվի:
Մենք ամեն ինչ անում ենք եւ այսպիսի ճիգ ու ջանքի մեջ ոչ անհատական ու ոչ էլ կուսակցական շահն է, որ խնդիր է: Երկիրն ու մեր ժողովուրդն է, որ հիմնական արժեք է, մենք դրան ենք հավատում եւ դա է, որ պետք է համոզում դարձնենք բոլորին, որ հանուն երկրի եւ ժողովրդի բոլորը պետք է զիջեն, ինչ-որ բանից պետք է զիջեն, որ ելք գտնվի:
Ի դեպ, մեր տեղեկություններով՝ Նիկոլ Փաշինյանի, Արարատ Միրզոյանի եւ Սասուն Միքայեյանի կալանավորման օրակարգով Ազգային Ժողովի արտահերթ նիստ չի նախատեսվում եւ նրանց անձեռնմխելիությունից զրկելու հարցը չի ընդգրկվելու խորհրդարանի օրակարգում։