Այս շարժումից առավելագույն արդյունք պետք է ստանալ
Posted on April 19, 2018, by admin, under Լուրեր, Հարցազրույցներ, Տեսաերիզներ.
Հանրային հեռուստաընկերության «Օրակարգից դուրս» հաղորդաշարի հյուրն է ՀՅԴ Բյուրոյի ներկայացուցիչ Հրանտ Մարգարյանը
(հարցազրույցի սղագրությունը)
-Այս օրերի զարգացումների եւ իրադարձությունների հանգուցալուծման մասին զրուցելու ենք ՀՅԴ Բյուրոյի ներկայացուցիչ Հրանտ Մարգարյանի հետ: Պարոն Մարգարյան, արդեն որերորդ օրն է շարունակվում են Նիկոլ Փաշինյանի եւ նրա կողմնակիցների բողոքի ակցիաները: Ի՞նչ է կատարվում Երեւանի փողոցներում:
-Ժողովրդի մի մասը փողոց է դուրս եկել եւ դա վկայությունն է այն բանի, որ երկրում առկա են դժգոհություններ: Մենք գիտենք, որ դժգոհություններ կան: Դրանք վերացնելու առումով, մենք արդեն նախաձեռնություններ ունեինք, նույնիսկ դրա հետ կապված գնացել էինք համագործակցության Հանրապետական կուսակցության հետ եւ ստորագրել համապատասխան համաձայնագիր, միասին աշխատելու, այդ պատճառները վերացնելու համար: Սա առաջին փաստն է, որ արձանագրվում է:
Երկրորդ փաստն այն է, որ մեր ճիգն ու ջանքը բավարար արդյունք չէին տվել, դանդաղ էր ընթացքը եւ հենց դա պատճառ դարձավ, որ ժողովուրդը առիթն օգտագործի ընտրությունների հարցում եւ դուրս գա փողոց: Մինչեւ այստեղ դրական է: Այն, որ փողոցում չկան բախումներ, տհաճ երեւույթներ, ժողովուրդը իր պարզ բողոքն ու դժգոհությունն է արտահայտում, դրական է: Հարցն այն է, որ մենք կարողանանք այս ամենից դրական եզրահանգումներ անել: Շատ անգամներ դա տեսել են Հայաստանում. Ստեփան Դեմիրճյանը, Րաֆֆի Հովհաննիսյանը, Սասնա ծռերը… Ամեն անգամ Դաշնակցությունը հրապարակ է իջել միջնորդություններով, որ կարողանա ստեղծված վիճակը օգտագործել երկրում հիմնական հարցեր լուծելու համար: Հաճախ ուժերը առաջնորդվել են ամեն ինչ կամ ոչինչ սկզբունքով եւ ոչ մի կողմը դրանից չի շահել: Այս անգամ, հույս ունեմ, որ Դաշնակցության երկխոսության, բանավեճի նախաձեռնությունը, հարթակ ստեղծելու ՝արդյունք կունենա, որի մասին նշվում է նաեւ մեր հայտարարության մեջ: Փաստ է, որ մենք կարող ենք այսօր, այս ստեղծված իրավիճակում ամենաճիշտ արդյունքը քաղել:
-Ստեղծել քաղաքական խորհրդածությունների հարթա՞կ:
-Այո, արդեն հայտարարությունը հրապարակվել է, մենք սկսել ենք խոսել բոլոր ուժերի հետ, որպեսզի բոլորին համոզենք, որ այդ հարթակի շուրջ, որտեղ կոնսենսուսով (համախորհուրդ) պետք է որոշում կայացվի, պետք է բոլոր հարցերը քննության նյութ դառնան: Հույս ունեմ, որ սա մենք կհաջողենք եւ այս վիճակը, որ ստեղծվել է դրսում, դրանից կարողանանք առավելագույն օգուտ քաղել: Հարցն այն է, որ մեր երկիրը շատ նուրբ իրավիճակում է, արտաքին սպառնալիքը իրական սպառնալիք է եւ ամեն վայրկյան կարող է վերածվել իրական վտանգի: Մեր երկիրը դյուրաբեկ է, դրա համար բոլորս պետք է շատ զգույշ լինենք: Պետք է հասկանանք, որ մեր երկիրը, մեր ժողովուրդը մեղք են: Չպետք է թողնենք, որ այս ամենը սխալ ուղղությամբ ընթանա, երկիրն ու ժողովրդին տանի տկարացման: Ընդհակառակը, այս ամենը պետք է տանենք մի ուղիով, որից երկիրն ու ժողովուրդը հզորացած, ուժեղացած դուրս կգան: Սա է մեր առաջարկությունը: Դժգոհության պատճառները պետք է վերացվեն, պետք է հիմնական փոփոխություններ արվեն:
-Այսինքն, այստեղ անելի՞ք ունեն իշխանությունները:
-Բնականաբար, իշխանությունն էլ ունի, ընդդիմությունն էլ:
– Ով ի՞նչ պետք է անի. շատ հստակ:
-Իշխանությունը պետք է կարողանա հասկանալ, որ առկա է դժգոհություն եւ պահանջ կա, որ ինչ որ երեւույթներ արագ տեմպերով սրբագրվեն երկրում, որ պատրաստ լինի զիջումներ անելու, նաեւ ընդդիմության դերակատարությունը հզորացնելու իմաստով:
-Լծակնե՞ր տալու:
-Այո: Ընդդիմությունն էլ պետք է հասկանա, որ չի կարող առաջնորդվել ամեն ինչ կամ ոչինչ սկզբունքով: Այս շարժումից, այս անգամ, պետք է առավելագույն արդյունք ստանանք: Ընդդիմությունն էլ պետք է հասկանա, որ այս շարժումը պետք է առաջ տանի ժողովրդավարական սկզբունքներին համահունչ: Ինչպես որ մինչեւ օրս եղել է: Նա չպետք է փորձի ուրիշներին կամք պարտադրել: Պետք է փորձի երկրի, ժողովրդի շահով առաջնորդվել եւ առավելագույնը ստանա, նրանից ինչ կարող է ստանալ: Կարծում եմ այս երկխոսությունը կարեւոր է , անհրաժեշտ է, որ մենք ի սկզբանե համոզվենք, որ առանց նախապայմանների ենք խոսելու, որ ամենքս համոզված պետք է լինենք, որ կոնսենսուսով խոսակցությունը կավարտվի: Ես վստահ եմ, որ կա դրա հնարավորությունը: Վստահ եմ, քանի որ մեր երկիրը, մեր ժողովուրդը դրա անհրաժեշտությունն ունի: Մենք չպետք է թողնենք, որ երկիրն ու ժողովուրդը կոտրվեն, երկիրը կոտրվի՝ արտաքին վտանգների առումով, դրա համար ժողովուրդը այս անգամ չպետք է ձախողվի: Այս անգամ ժողովուրդը պետք է արդյունք ստանա: Եվ այդ արդյունքի համար պետք է բծախնդիր լինենք բոլորս: Բոլորս անխտիր՝ սկսած իշխանությունից, վերջացրած ընդդիմությամբ:
– Պարոն Մարգարյան բողոքող ցուցարարները պայքարում են Սերժ Սարգսյանի վարչապետության դեմ: Գոնե առաջին օրերին կոչերն այդպիսին էին: Այսօր, ի՞նչ է պատրաստ իշխանությունը տալ բողոքողներին: Եվ ի՞նչ են պահանջում Նիկոլ Փաշինյանը եւ նրա կողմնակիցները:
-Ի՞նչ են պահանջում, իբրեւ երեւույթ, որ արծարծում են, տարբեր է: Տարբեր է եթե ժողովրդին տոն տվող պատճառները բնականաբար ուրիշ են. Երկրի մեջ առկա կոռուպցիան է, մենաշնորհներն են, անարդարության երեւույթները, հովանավորչությունը, ամենաթողությունը: Նմանատիպ երեւույթներն են, որ պատճառ է դառնում ժողովրդի դժգոհության: Եվ այդ դժգոհությունը որոշների մոտ արտահայտվում է վարչապետին մերժելու պահանջով: Սակայն բուն հարցը այն երեւույթներն են, որոնք պատճառ են հանդիսացել այդ տեսակ պահանջ ձեւավորվելուն: Այդ բուն երեւույթներն է անհրաժեշտ սրբագրել:
– Այսինքն, խնդիրը համակարգի եւ ոչ անձերի մեջ տեսնելն է:
– Վստահ եմ որ այդպես է: Ասեմ, մենք ինչ լուծում ենք առաջարկում: Մենք ընդունել ենք այս Սահմանադրությունը : Այս Սահմանադրության հիմքի վրա խորհրդարանական ընտրություններն են կազմակերպվել, այս Սահմանադրության հիմքի վրա ձեւավորվել է այս խորհրդարանը, Սահմանադրության հիմքի վրա խորհրդարանը ընտրել է նախագահ եւ ունեցել վարչապետ: Այս առումով մենք ելք չունենք: Ելքը կամ ցնցումներն են՝ երկրում անկայուն իրավիճակ, քաոս ստեղծելը, որը կկոտրի երկիրը եւ կամ դրանց պատճառները վերացնելը, որպեսզի ժողովուրդը սրա միջից շահող դուրս գա, եւ երկիրն առաջ գնա: Մեր բոլոր միջամտությունները, որ արել ենք այս նկատառումով են եղել: Այսօր էլ նույնն ենք անում: Կոալիցիա ենք կազմել, որ այդ պատճառները վերացնենք: Այսօր փողոցում կա մեկ պահանջ, որ ավելի է հզորացնում մեր դիրքերը՝ պատճառները վերացնելու մեր ջանքերը: Մենք այդ առումով ենք ուզում շահել՝ ցույց տալ ելք, ճանապարհ: Եթե անձ կփոխվի, հանրապետականը մեկ ուրիշ թեկնածուի ներկայացնի, նրան էլ մի հազար հոգի չընդունեն, դա ելք չի, դա մեզ տեղ չի հասցնի: Պետք է պատճառները վերանան, վերանան այնպես, որ ոչ ոք չկարողանա այս բացասական երեւույթների վրա իշխանություն ձեւավորել:
-Պարոն Մարգարյան ստեղծված իրավիճակում ամենամեծ անելիքը ո՞ւմն է, այս կողմինը, թե՞ այն կողմինը:
-Իշխանությանն է: Իշխանությունն ավելի մեծ անելիք ունի:
-Երբ ասում եք իշխանություն, նաեւ ձե՞զ նկատի ունեք եւ Հանրապետականին:
– Այո: Մեր չափով նախաձեռնություն արդեն ունեցել ենք: Բնականաբար: Եվ նաեւ ընդդիմություն կամ, այսպես ասած, ժողավրդային դժգոհությունն այսօր մարմնավորող ուժն է, որը հրապարակի վրա է:
-Իսկ Նիկոլ Փաշինյանի խմբակցության գործընկերնե՞րը:
– Կարծում են նրանք իրարից տարբերվում են միայն այնքանով, որ մեկը չի ընդունում մյուսի այս պահի գործունեության ձեւը: Թե չէ ըստ էության նրանք շատ էլ չեն տարբերվում իրարից: Սակայն մենք ասում ենք, որ խորհրդակցության սեղանի շուրջ, ուր պետք է հավաքվենք խորհրդարանական բոլոր ուժերը պետք է լինեն: «Ելքը» նաեւ այդ երեք կուսակցությունների ղեկավարությամբ պետք է ներկայություն ունենա, որովհետեւ այս պահին այնտեղ չկա միասնականություն: Մենք ուզում ենք տալ առավելություն, որ երեք + երեք ձեւաչափով խորհրդակցության սեղան ձեւավորվի, որտեղ կարողանանք ելք գտնել երկրում առկա դժվարությունները հաղթահարելու հարցում:
-Պարոն Մարգարյան, շատ անկեղծ, կարծում եք Նիկոլ Փաշինյանը պատրա՞ստ է ընդունել ձեր մեկնած ձեռքը , քաղաքական խորհրդակցությունների հարթակ եք առաջարկում ստեղծել:
– Այնքանով, որ ես հետեւել եմ այս քաղաքական գործչի գործունեությանն ու տրամաբանությանը, կարծում եմ ինքն այնքան խելացի է, հասկանալու համար, որ այս ճանապարհը թե իր համար է ելք, թե երկրի եւ թե բոլորի: Այլ ճանապարհը իր մոտ… Ինչ որ իմաստով գուցե հույս ունենա համընդհանուր հեղափոխության, բայց ես ուզում եմ, որ այն վիճակը, որ Փաշինյանը ստեղծել է երկիրը կարողանա դրանից օգտվել, պատճառ դառնա, որ երկիրը դրանով կարողանա թռիչքային քայլ անել դեպի առաջ, այդ ձեռքբերումն ինքն ունենա: Նախապես ասեցի, Սասնա ծռեր, Րաֆֆի Հովհաննիսյան, Ստեփան Դեմիրճյան, ԼՏՊ, չունեցան այդքան խելացիություն, համարձակություն եւ ճկունություն, որպեսզի դրան վերածեն այն ձեռքբերումը, որ ունեցել էին հրապարակի վրա, փողոցում: Դա չկարողացան վերածել իրական առավելության ՝ երկրի եւ ժողովրդի համար: Հույս ունեմ, որ Նիկոլ Փաշինյանն այն քաղաքական գործիչն է, որ դա կանի: Դա կանի եւ դրանով ինքը բարձր տեղ կնվաճի Հայաստանի քաղաքական դաշտում:
-Խանգարողներ կան, կլինե՞ն:
-Բնականաբար, խանգարողներ միշտ էլ կան: Բոլոր ուժերի կողքին էլ խանգարողներ կան. Մեկը խորհուրդ է տալիս մի զիջիր, ջարդիր գնա առաջ, մյուսը՝ ջարդիր, գնա իշխանությունը վերցրու…Նման խորհրդատուներ կարող են լինել, կարող են լինել նաեւ մութ նպատակներ հետապնդող խորհրդատուներ, դրանք կարեւոր չեն, կարեւորը քաղաքական անձն է, ով եթե վերցրել է առաջնորդի դրոշը պետք է կարողանա ժողովրդին ցույց տա խոհեմություն, ցույց տա, որ ինքը չունի անձնական շահ, անձնական խնդիր երկրի թիվ 1-ը դառնալու, այլ ունի խնդիր երկրի մեջ հարց լուծելու եւ ժողովրդին բարեկարգ վիճակի հասցնելու: Դա իրեն առաջ հեռանկար կբացի ավելի առաջ գնալու, ավելի մեծ ազդեցություն ունենալու Հայաստանի քաղաքական կյանքում:
– Պարոն Մարգարյան Դաշնակցությունը առաջարկություն է արել, բայց մյուս կողմից Դաշնակցությանը քննադատողների պակաս, հատկապես այս օրերին, կարծես չի զգացվում սոցիալական ցանցերում եւ ուրեմն կարծում եք այս ֆոնին ընդունելի կլինի՞ եւ կկարողանա՞ք կյանքի կոչել ձեր այս առաջարկությունը:
-Այն քաղաքական ուժը, որը երբեւէ կարող է մտածել, թե ինքը կարող է հակառակորդ չունենալ, նշանակում է պետք է գոյություն չունենա: Այն ուժը որ գոյություն չունի, նաեւ հակառակորդ չունի:
Դաշնակցությունն իր կողքին միշտ ունեցել է հակադաշնակցություն: Դրան մենք ընտելացել ենք մեր ծննդյան օրից: Դա մեզ համար զարմանալի չի: Այսօր սակայն, այդ հարցի մեջ նոր նրբերանգներ են ի հայտ եկել: Կա մի շերտ, որը քաղաքականացած չի եւ չի հասկանում , չի կարողանում ընկալել թե Դաշնակցությունը , ինչ է անում, եւ ինչ է ուզում անել, ուր է գնում, ինչ ռազմավարություն, դերակատարություն ունի:
– Դա միայն ի՞ր խնդիրն է, թե՞ նաեւ Դաշնակցության:
-Բնականաբար Դաշնակցության խնդիրն է: Բայց կան մարդիկ՝ նաեւ մեր մեջ, մեր շուրջը, մեզ հարազատ մարդիկ, որ մեր շուրջն են, բայց ավելի շատ զգացական կապերով են մեզ կապված, եւ ոչ քաղաքական այն ճանաչողությամբ ու գիտակցությամբ, որ քաղաքական կուսակցությունը պետք է ունենա: Դրանք մարդիկ են, որոնք Դաշնակցությանն այնքան են սիրում, որ ուզում են, որ Դաշնակցությունը միշտ ծափահարվի: Նրանք չեն կարողանում հաշտվել այն մտքի հետ, որ Դաշնակցությունը քաղաքական կուսակցություն է՝ ունի իր ուղին, իր ռազմավարությունը, որը կարող է նաեւ ունենալ քննադատողներ, հակառակորդներ: Այսինքն միշտ ծափահարվել չի կարող Դաշնակցությունը եւ դա ողբերգություն չի: Կարեւորն այն է, որ մեզ կարողանան հասկանալ այնպես, որ մենք միշտ աշխատում ենք Հայաստանի եւ հայ ժողովրդի շահերից ելնելով: Ծափահարել – չծափահարվելու հետ մենք հաշտ ենք, դա երկրորդական է, մի օր կարող ես ծափահարվել, մի օր ՝ ոչ: Դա չէ, որ կարեւոր է: Կարեւրորը՝ որ այն ինչ Դաշնակցույթունն անում է անկեղծ է անում, Հայաստանի ու հայ ժողովրդի , զարգացման լիարժեք հնարավորության համար է անում:
-Պարոն Մարգարյան ոստիկանների գործողություններն այս օրերին համաչա՞փ էին եւ ցուցարարների արարքներում քայլերում կա՞ մի բան, որ ձեզ համար անընդունելի է:
-Երբ այդքան մեծ թվով ժողովուրդ է դուրս գալիս , շատ դժվար է կարգ ու կանոնի մեջ պահել բոլորին: Կլինեն մարդիկ, որոնք ընդհանուր կանոներից դուրս կգան: Այսօր ցույցերի հինգերորդ օրն է, նկատելի է, որ ցուցարարների կողմից նվազագույն հակաօրինական կամ ժողովրդավարության դեմ դեպքեր են եղել, որի համար ես ուրախ եմ նաեւ ողջունում եմ, որ այս ընթացքը շարունակվի, որովհետեւ բախումը ոչ միայն ցանկալի չի, այլեւ դեմ է ժողովրդային շարժման նպատակներին, երկրի կայունությանը, հեղինակությանը:
Երկրորդ՝ ոստիկանությունն է, որ մինչեւ այս պահը կարողացել է մնալ պարկեշտության, չափի, զսպվածության սահմաններում, որի համար ես դարձյալ ուրախ եմ, եւ ուզում եմ, որ այս ընթացքը շարունակվի: Մենք բախումը պետք է բացառենք:
– Եվ շարունակվի մինչեւ որտե՞ղ պրն. Մարգարյան: Անկախ մեր ցանկություններից, ի՞նչ ելք եք կանխորոշում: Խոհեմություն կցուցաբերե՞ն երկու կողմերն էլ եւ հանգուցալուծումը՝ եթե ամփոփեք:
-Երկու բան չպետք է պատահի, առաջին, բախման չպետք է գնանք: Երկրորդ. չպետք է անենք մի բան, որ արտաքին միջամտության անհրաժեշտություն, կարելիություն ստեղծվի: Եթե կարողանանք այս երկու բանը չանել, որքան կուզի թող տեւի, դրանից միայն երկիրը կօգտվի եւ կարող է լուրջ օգուտներ քաղել, մենք կարող ենք մեր կյանքը փոխել եւ նոր որակի իշխանություն ձեւավորել: Բայց նաեւ պետք է հասկանանք, որ դա շատ դժվար, նուրբ աշխատանք է ՝ թե շարժումը ղեկավարողների առումով, եւ թե ոստիկանության: Մենք մարդկային գործոնի հետ գործ ունենք՝ նուրբ զգայարաններ, նյարդեր: Կարող է մի փոքր առիթ բախման պատճառ հանդիսանա, եւ հետեւանքը շատ ծանր լինել: Մենք չենք ուզում, որ դա տեղի ունենա:Կարծում եմ շարժումը նվաճել է այն իրավունքը, որ այսօր կարողանա դրա հետեւանքների առումով նոր ձեռքբերումների ձգտել:
-Այն որ ցուցարարների մեջ մեծամասնություն են կազմում երիտասարդները, ինչի մասին է խոսում՝ պրն. Մարգարյան
– Ուրախ եմ., որ մեր ուսանողությունը, երիտասարդությունը, քաղաքական օրակարգը իր համար դարձրել է հիմնական օրակարգ: Եւ որ նրանց մտահոգում է ազգի, երկրի, ժողովրդի ճակատագիրը եւ ինքն ուզում է դերակատար լինել: Կարեւոր չի որ ուղղությամբ, կարեւոր չի որ քաղաքականության ռազմավարությամբ, կարեւորը՝ որ ինքը երկրի քաղաքական ճակատագրի մեջ ուզում է դերակատար լինել: Ուզում եմ, դա քաղաքականացման մի նոր ընթացք ստեղծի երիտասարդության մեջ, որպեսզի նրանք կարողանան հասկանալ քաղաքական ուղղությունները, գործընթացները եւ քաղաքական ուղղությունների ընտրության հարցում ամբողջությամբ ճիշտ ճանաչողություն ձեռք բերեն եւ քայլերը կատարեն գիտակցաբար:
– Շնորհակալություն զրույցի համար պրն. Մարգարյան:
arfd.am
