Նախագահի պաշտոնի ՀՅԴ թեկնածուն` երկու ամսից
Posted on September 5, 2012, by admin, under Լուրեր, Հարցազրույցներ, Տեսաերիզներ.
«A1plus»-ի «Հետգրություն» հաղորդաշարի հյուրն է ՀՅԴ Բյուրոյի ներկայացուցիչ Հրանտ Մարգարյանը
ՀՅԴ-ն պատրաստվում է առաջիկայում կայանալիք ՀՀ նախագահական ընտրություններին:
«Երկու ամսից, հավանաբար, մենք կունենանք Գերագույն ժողով, որը կորոշի մեր մասնակցության ձեւը, մեր թեկնածուին: Կարծում եմ, որ երկու ամսից մենք այս հարցերի պատասխանը կունենանք: Անձամբ ես հակված եմ մասնակցելուն»,- «Ա1+»-ի եթերում ասել է ՀՅԴ Բյուրոյի ներկայացուցիչ Հրանտ Մարգարյանը:
Նա նշել է, որ նախագահական ընտրությունները Հայաստանում ամենաքաղաքականացված ընտրություններն են եւ հիմնականում դրանց ժամանակ է արտահայտվում ժողովրդի իրական տրամադրվածությունը:
ՀՅԴ-ն ամեն կերպ ցանկանում է օգնել սիրիահայերին, բայց, ցավոք, քիչ բանով է կարողանում. «Տրամադրություն ունենք ամեն ինչով օգտակար լինել: Մենք այնտեղ միասնական փոխօգնության շտաբ ենք ձեւավորել, որ համայնքը անտեր չմնա, կարիքավոր մարդիկ հենարան ունենան, փորձել ենք միջկուսակցական, միջեկեղեցական միասնական կառույց ձեւավորել առաջնորդարանին կից: Փորձում ենք հայկական հաստատությունները պահել, համայնքի ներկայացուցիչներին աջակցել, թեեւ տեղեկությունները շատ սահմանափակ են: Ծրագրում ենք ուղղակի օգնություն հասցնել Սիրիայի հայերին եւ ժողովրդին: Սիրիահայը թողնում է Սիրիան եւ գալիս է ուրիշ երկիր, եւ մենք նրան օգնելու պարտավորություն ունենք: Բայց ավելի շատ պարտավորություն ունենք այն սիրիահայերի նկատմամբ, որ այնտեղ ապրում են, դուրս չեն գալիս եւ հնարավորություն չունեն էլ դուրս գալու: Մենք դրանց մասին պետք է մտածենք»,- ասել է Հրանտ Մարգարյանը` հավելելով, որ ՀՅԴ-ն նախաձեռնել է ու շուտով օգնություն կհասցնի Աիրիայի հայությանը եւ սիրիայի ժողովրդին. «Չես կարող առանձնացնել: Չես կարող ասել` հայ է` օգնում ենք, հայ չէ` չենք օգնում»:
Խոսելով Գուրգեն Մարգարյանին հրեշավոր կերպով սպանած Ռամիլ Սաֆարովին Ադրբեջան արտահանձնելու, այնտեղ նրան ներում շնորհելու ու հերոսացնելու թեմայի վերաբերյալ` ՀՅԴ Բյուրոյի ներկայացուցիչ Հրանտ Մարգարյանը ասել է.
«Հայաստանի արտգործնախարարությունը` իր դեսպանատներով, իր հյուպատոսություններով, համապատասխան ակտիվություն չի ցուցաբերում, մասնավորաբար` եթե դա համեմատում ենք Ադրբեջանի համապատասխան կառույցների աշխատանքի հետ: Ես չեմ ուզում մեղադրել դեսպաններին, հյուպատոսներին: Հավանաբար, այդտեղ էլ համապատասխան մեղքի բաժին գոյություն ունի, բայց ես կարծում եմ` գործը ընդհանրապես չի կազմակերպվում, առաջադրանքներ չեն տրվում: Մենք բավարար ներկայություն չունենք այլ երկրների մեջ` քաղաքական, դիվանագիտական առումներով, որ պետք է ունենանք, ինչ որ ունի Ադրբեջանը: Ճիշտ է, ադրբեջանական բյուջեն ավելի հնարավորություններ է ընձեռում իրենց, բայց դա ամեն ինչի եւ ոչնչի հարաբերակցությամբ չպետք է լինի: Մեր դեսպանատների թիրախը հաճախ համայնքներն են, ոչ թե պետությունը»:
Հայաստանը, ըստ ՀՅԴ Բյուրոյի ներկայացուցչի, աշխատանք ունի անելու նաեւ իրավական ոլորտում, կա անհրաժեշտություն դիմելու Եվրադատարան, քանի որ թեեւ բանտարկյալին տեղափոխելը ապօրինություն չէ, բայց հանցագործը չի կարող պատիժ չկրել:
«Եթե ես երկրի նախագահ լինեի, չէի ուզենա Սյունիքի մարզպետի պես մարզպետ ունենալ, որովհետեւ դա ինձ է ամոթ: Ամոթ է ինձ, որ իմ մարզպետը այդ մակարդակի մարդ լինի, որ մարդկանց տանի մարզպետարան` ապտակի: Դաշնակցականը չի տարել, դաշնակցականը չի ապտակել, այդքան խելացի է եղել, որ դա չանի»,- անդրադառնալով առաջիկա ՏԻՄ ընտրություններին եւ մասնավորապես Կապան քաղաքում տիրող նախընտրական իրավիճակին:
«Որ մեր քաղաքապետը դաշնակցական էր, ի՞նչ ապահովեց Դաշնակցության համար կամ ի՞նչ վնաս տվեց պետությանը, ի՞նչ վնաս տվեց իշխող կուսակցությանը: Ի՞նչն էր դրա առավելությունը եւ արժե՞ր, որ իշխանությունն իր հեղինակությունը խնդրո առարկա դարձներ ժողովրդի մոտ այդ տեսակ գործունեությամբ: Ես դրա իմաստը չեմ հասկանում»,- նշել է նա:
Հրանտ Մարգարյանի խոսքերով` թեեւ ուրախ կլիներ, որ ընդդիմության ներկայությունը մեծ լիներ ՏԻՄ ընտրություններում, սակայն, ցավոք, բավարար չէ: Անգամ ՀՅԴ-ի ներկայությունը կուսակցության Բյուրոյի ներկայացուցիչը բավարար չի համարում:
