Հրանտ Մարգարյան. Սիրիայի հայ համայնքը չպետք է փորձի թիրախ դառնալ
Posted on August 30, 2012, by admin, under Լուրեր, Հարցազրույցներ.
«Ազատություն».-Սիրիայում, բարեբախտաբար, որեւէ հակահայկական շարժում, հակահայկական ակցիա դեռեւս չկա, ընդգծում է ՀՅ Դաշնակցության Բյուրոյի ներկայացուցիչը։
ՀՅ Դաշնակցության Բյուրոյի ներկայացուցիչ Հրանտ Մարգարյանը չափազանցված է համարում տարածված այն լուրերը, որ սիրիահայերը զինվել են եւ սիրիական բանակի հետ պաշտպանում են հայկական թաղամասերն ու իրենց տները։
«Ես կարծում եմ, որ այդ լուրերը չափազանցված են, իրականությունն այն է, որ սահմանափակ հնարավորություններով փորձում են հայկական հաստատությունները, իրենց բնակված, բնակելի տները զերծ պահել, այսպես ասած… այս ընթացքի մեջ նաեւ կան բաշիբոզուկներ, կան թաղային խուլիգաններ, հանցագործ տարրեր` դրանցից ապահովել իրենց բնակարանները եւ իրենց շինությունները։ Բայց մասնակցել այս ամեն ինչին` այդպիսի բան գոյություն չունի», – «Ազատություն» ռադիոկայանի հետ զրույցում ասաց Մարգարյանը։
Նրա խոսքերով` սիրիահայերը տվյալ երկրի քաղաքացիներն են, կարող են ունենալ տարբեր դիրքորոշումներ, կարող են լինել իշխանության կամ ընդդիմության հետ, բայց համայնքը` իբրեւ հավաքականություն, այս ամենում չեզոքություն է պահպանում` «այն առումով, որ պատերազմը, կռիվը, եղբայրասպան կռիվը չի կարող ընդունի իբրեւ ելք` այս վիճակից դուրս գալու, եւ ինքը առանձնաբար չպետք է փորձի որեւէ կողմի համար թիրախ դառնալ»։
ՀՅ Դաշնակցության Բյուրոյի ներկայացուցիչը ասաց, թե ցավալի է, որ այդ պատերազմական գործողություններում նաեւ հայեր են զոհվում, սակայն պետք է ուշադրություն դարձնել այն հանգամանքի վրա, որ Սիրիայում, բարեբախտաբար, որեւէ հակահայկական շարժում, հակահայկական ակցիա դեռեւս չկա։
Իսկ ինչ վերաբերում է սիրիական ընդդիմության կողմից հայկական համայնքի հասցեին հնչեցված սպառնալիքների մասին տեղեկություններին, ապա Հրանտ Մարգարյանը կարծում է, որ «դա ընդդիմության մեկ խմբակ էր, ոչ թե ամբողջ ընդդիմությունն էր, եւ ընդդիմությունը իր ընդհանրության մեջ հերքեց այդ լուրը` ասաց, որ իր հետ կապ չունի»։
Ռուզաննա Ստեփանյան
