Հրանտը հանդիպում է Սերժին
Posted on February 28, 2012, by admin, under Հարցազրույցներ.
«Հայկական Ժամանակ»– Հայ Յեղափոխական Դաշնակցությունը շուտով սկսելու է կամավորների հավաքագրում` իշխանություններին արդար ընտրություններ պարտադրելու նպատակով:Հայաստանի քաղաքագետների միությունում հրավիրված քննարկման ժամանակ երեկ այս մասին հայտարարեց ՀՅԴ Բյուրոյի ներկայացուցիչ Հրանտ Մարգարյանը:
Քննարկումից հետո տեղի ունեցավ բրիֆինգ: ՀՅԴ Բյուրոյի ներկայացուցիչ Հրանտ Մարգարյանը պատասխանեց լրագրողների հարցերին:
– Պարոն Մարգարյան, ո՞վ է գլխավորելու ՀՅԴ համամասնական ցուցակը:
– Մենք, ցավոք սրտի, ունենք շատ մարդիկ: Ցանկացած մարդ կարող է գլխավորել մեր ցուցակը:
– Դուք կգլխավորե՞ք:
– Չեմ կարծում: Չէ:
– Իսկ ընդհանրապես մասնակցելո՞ւ եք ընտրություններին, առաջադրվելո՞ւ եք համամասնական, մեծամասնական ընտրակարգով:
– Իմ ցանկությունն է, որ չմասնակցեմ: Եվ իրականում ցանկությունս է:
– Իսկ հնարավո՞ր է համոզել:
– Չեմ կարծում:
– Այնուամենայնիվ կբացատրե՞ք` ինչու չեք ուզում մասնակցել ընտրություններին: Որեւէ պատճառ կա՞:
– Ես ի՞նչ իմանամ: Իմ գործն էնքան շատ ա, որ չեմ կարողանա: Էթամ խորհրդարան` ի՞նչ անեմ:
– Հնարավո՞ր է` գլխավորեք ցուցակը եւ չգնաք ԱԺ: Հիմա Սերժ Սարգսյանը որ ցուցակը գլխավորելու է, հո ԱԺ չի՞ գնալու:
– Դա լավ օրից չի, որ Սերժ Սարգսյանը ցուցակ է գլխավորելու: Կուսակցության մեջ պետք է լինեն այնքան մարդիկ, որ կարողանան ցուցակը գլխավորել, եւ ցուցակից որեւէ բան չպակսի: Մեր կուսակցության մեջ էնքան մարդ կա: Մեկ ուրիշն էլ թող էդ գործը անի: Ամեն գործ ե՞ս անեմ:
– Վահան Հովհաննիսյա՞նն է գլխավորելու:
– Մեկը կգլխավորի, էլի:
– Ե՞րբ կհրապարակվի ցուցակը:
– Երբ որ ժամանակացույցը պահանջում է:
– Հնարավո՞ր է, որ Դաշնակցությունը նորից կոալիցիա կազմի Հանրապետականի հետ, ԲՀԿ-ի հետ:
– Ավելի շատ հավանական եմ համարում, որ մեր առանցքի շուրջ ուրիշները փորձեն ձեւավորել կոալիցիա: Չեմ կարծում, որ այնպես կլինի, որ մենք կոալիցիա կկազմենք: Դրա պատճառը այսօր մենք չունենք: Իսկ պատճառներ` կոալիցիա չկազմելու, շատ ունենք:
– Բայց չե՞ք բացառում, որ կկազմեք:
– Որեւէ բան այս կյանքում բացառված չէ. եթե պատերազմ սկսվի, Աստված մի արասցե, կարծում եմ` բոլորս պիտի համախմբվենք:
– Խաղաղ պայմաններում` նկատի ունեմ:
– Այսօրվա պայմաններից ելնելով` ոչ մի պատճառ չկա:
– Սրանից մոտ 2 տարի առաջ ձեր որդու հարսանիքին մասնակցում էին Սերժ Սարգսյանը, նաեւ Ռոբերտ Քոչարյանի թիմակիցները` Վարդան Օսկանյան եւ այլն: Դուք մինչեւ հիմա էլ նրանց հետ ջերմ հարաբերություննե՞ր եք պահպանում:
– Այո, ես վերջապես էդ մարդկանց հետ միասնական կյանք ենք ունեցել: Բացի քաղաքական պայքարը, նաեւ ընկերություն ենք ունեցել: Ես մասնակցել եմ իրենց ընտանիքի ուրախությանը, իրենք էլ մասնակցել են իմին: Ես չեմ կարծում, որ մենք այնքան պետք է գռեհիկացնենք մեր կյանքը, որ քաղաքականությունը այդպես չարությամբ անդրադառնա մեր անձնական կյանքի վրա:
– Տեղեկություններ կան, որ ե՛ւ Սերժ Սարգսյանի, ե՛ւ Ռոբերտ Քոչարյանի հետ հիմա էլ շարունակում եք հանդիպումները, շփումները: Նրանց մեջ հակասություն կա՞, ձեր տպավորությամբ:
– Մենք չենք հանդիպում սեր բացատրվելու, հանդիպում ենք վիճելու, վիճաբանելու: Հանդիպում-բանակցությունն այդ տեսակ հանդիպում չէ: Եթե հանդիպում ես` ինչ-որ հարցի շուրջ խոսում ես… Մենք վերջապես այս պետականության արտաքին քաղաքական առումով համագործակցում ենք: Եթե Ղարաբաղի հարց է արծարծվում, եթե Սումգայիթի հարց է արծարծվում, եթե մեր երկիրը տնտեսապես նեղը դնելու խնդիր է ստեղծվում, մեր երկրի համար հնարավորություններ ստեղծելու խնդիր է ստեղծվում, մենք աշխատանք ենք տանում` անկախ նրանից, որ մենք այս իշխանությանը չենք ընդունում:
– Հիմա, երբ հանդիպում եք Սերժ Սարգսյանի հետ, ինչի՞ շուրջ եք վիճում:
– Ընտրությունների վերաբերյալ, արտաքին քաղաքականության վերաբերյալ, Ղարաբաղի հարցի վերաբերյալ, հայ-թուրքական հարաբերությունների վերաբերյալ: Միշտ թեմաներ ունենք մենք:
– Վերջին անգամ ե՞րբ եք հանդիպել:
– Ես ի՞նչ իմանամ: Մի շաբաթ առաջ հավանաբար:
– Ընտրությունների շո՞ւրջ էր կռիվը:
– Այո:
– Իսկ նախագահական նստավայրո՞ւմ եք հանդիպում:
– Այո: Բոլորն էլ հանդիպում են, մի մտածեք` միայն ես եմ հանդիպում:
– Բոլորը` ովքե՞ր:
– Ում որ կուզեք` մտածեք դրա մեջ:
– Դուք մի քանիսին նշեք:
– Թող իրենք անկեղծ լինեն, ասեն:
– Իսկ ճի՞շտ է, որ վերջին հանդիպումներում Սերժ Սարգսյանի հետ արդեն պայմանավորվել եք ապագա ԱԺ-ում Դաշնակցության տեղերի հետ կապված:
– Եթե չասեք` այդ տեղեկությունը որտեղից, ես դա անլուրջ կհամարեմ:
– Չասացիք` ձեր տպավորությամբ հակասություններ կա՞ն Սերժ Սարգսյանի եւ Ռոբերտ Քոչարյանի միջեւ:
– Իրենցից հարցրեք:
– Ինչպե՞ս եք գնահատում ՀՅԴ-ի շանսերը առաջիկա ընտրություններում:
– Որ ասեմ` մենք ժողովրդի մեծամասնությունն ունենք` չէ: Բայց ես մի բան կարող եմ ասել` մենք ցանկացած կուսակցությունից ավելի իրական, ավելի լուրջ ժողովրդական հենարան ենք: Սա առնվազն կարող եմ ասել, եւ սրա մեջ չափազանցություն չկա:
– Հավատո՞ւմ եք, որ արդար ընտրություն տեղի կունենա:
– Ես ամեն ճիգ պետք է թափեմ, որ արդար ընտրություն տեղի ունենա: Ես ասացի, որ այդ արդար ընտրությունները մենք պիտի փորձենք պարտադրել: Ճիշտ չի այսօրվանից խոսել անարդար ընտրությունների մասին: Հետո ո՞նց եմ ես իմ հարեւանին համոզում, որ գնա քվեարկիր, կարեւոր է դա: Որովհետեւ նա ասելու է` դու մի տարի ասում ես` անիմաստ է, կկեղծեն, էլ ես ինչո՞ւ էրթամ քվեարկեմ: Ավելի լավ չի՞ 5000-ն առնեմ, էրթամ իմ պարտականությունը կատարեմ, գամ:
– Եթե կեղծվեն այս ընտրությունները, Դաշնակցությունը դուրս կգա՞ փողոց:
– Գիտե՞ս, Հովհաննես Թումանյանը Կիկոսի պատմությունը իզուր չի հորինել: Արի Կիկոսի վիճակի մեջ չընկնենք:
– Պարոն Մարգարյան, բայց ՀՀԿ-ն արդեն խախտում է օրենքը: Հեռուստատեսությամբ ցույց են տալիս վարչապետի այցերը մարզեր…
– Ես, իհարկե, կարծում եմ, որ դա ճիշտ չի, դա սխալ է, բայց վարչապետը, չեմ կարծում, որ քարոզչություն է անում: Նա հակաքարոզչություն է անում:
