ՀՅԴ-ն կրկի՞ն կհամագործակցի Սերժ Սարգսյանի հետ
Posted on January 24, 2012, by admin, under Հարցազրույցներ.
ՀՅԴ Բյուրոյի ներկայացուցիչ Հրանտ Մարգարյանի հարցազրույցը «Հրապարակ» օրաթերթին
ՀՅԴ բյուրոյի ներկայացուցիչ Հրանտ Մարգարյանը մեզ հետ զրույցում չբացառեց, որ ՀՅԴ-ն կարող է նորից համագործակցել Սերժ Սարգսյանի հետ, քանի որ «քաղաքականության մեջ ոչինչ չի բացառվում»:
Առաջիկայում խորհրդարանական ընդդիմության` ՀՅԴ-ի ու «Ժառանգության» միջոցով խորհրդարան կներկայացվի 100 տոկոսանոց համամասնական ընտրակարգի անցնելու վերաբերյալ ընդդիմադիր ուժերի առաջարկը, որին արդեն դեմ է արտահայտվել իշխող Հանրապետական կուսակցությունը, եւ որին կողմ են քաղաքական գրեթե մյուս բոլոր ուժերը:
– Պարոն Մարգարյան, չե՞ք կարծում, որ 100 տոկոսանոց համամասնականի անցումը չի կանխի ընտրակեղծիքները, քանի որ կուսակցությունների կողմից կարող են ընտրակեղծիքներ լինել: Վերջապես նույն փողատերերն ու օլիգարխները կարող են կուսակցական ցուցակ մտնել եւ ընտրակեղծիքներ անել կուսակցությունների համար:
– Սա ընտրակեղծիքների դեմ պայքարի հիմնական միջոցներից մեկն է, բայց ոչ միակը: Սրանով հարցը չի լուծվում, բնական է: Դրա համար շատ ուրիշ պայմաններ են պետք: Շատ ավելի այլ պայմաններ են պետք, որ ընտրություններն իսկապես չկեղծվեն, բայց մեծամասնական համակարգն իսկապես կեղծիքի հնարավորություն է ստեղծում: Առաջին ամենամեծ կեղծիքը, եթե նույնիսկ ընտրատեղամասում կեղծիք չլինի, դա այն է, երբ քաղաքական ուժը ներկայանում է խորհրդարանում ոչ իր իրական ժողովրդականությանը համապատասխան ներկայությամբ: Հասարակության մեջ այլ ժողովրդականություն ունի, բայց խորհրդարանում ներկայանում է իբրեւ այլ ուժ: Եվ սա հիմնական պրոբլեմն է, որ երկրում ստեղծում է քաղաքական բարդություն: Կարեւոր է, որ քաղաքական ուժն իր իրական ուժին համապատասխան ներկայություն ունենա խորհրդարանում, ոչ տարբեր:
– Կարծում եք, հարյուր տոկոսանոց համամասնական ընտրակարգով այդ հարցը կլուծվի՞, եթե, օրինակ, նույն օլիգարխներն ու մեծահարուստներն այս կամ այն կուսակցության ցուցակով մտնեն խորհրդարան:
– Բնականաբար, որովհետեւ, ցավոք սրտի, մեծամասնականի պարագայում Հայաստանում դեռ չի ձեւավորվել այն մշակույթը, որ քաղաքական մարդը կարողանա ընտրվել: Մեծամասնականով ընտրվում են այլ հարաբերությունների ընթացքում, եւ ճիշտ այդ պատճառով կուսակցությունների համար իրենց ժողովրդականությանը, ուժին ոչ համապատասխան ներկայություն է ապահովվում:
– Բայց համամասնականը կլուծի՞ այդ խնդիրը:
– Այո, կլուծի, որովհետեւ դա առաջին հերթին կնվազեցնի տարբերությունը, որ կուսակցություններն ունեն իրենց իրական ժողովրդականության եւ խորհրդարանում ներկայացվածության միջեւ:
– Եթե համամասնականի այս առաջարկն ընդունվի, Դաշնակցությունը քանի՞ տեղ կունենա խորհրդարանում:
– Ավելորդ հարցեր եք տալիս:
– Ինչո՞ւ:
– Ընտրության օրը կորոշվի, կհաշվենք:
– Ասվում է, որ համամասնականին կողմ են հիմնականում այն կուսակցությունները` Դաշնակցությունը, «Ժառանգությունը», որոնք մեծամասնականով ընտրվելու ռեսուրս չունեն:
– Դե հիմա ամեն մարդ ամեն ինչ էլ կարող է ասել, ազատ է, բայց որեւէ քաղաքական ուժի իրական ժողովրդականության չափը ճշտելու համար պետք է գտնել գաղափարական հենարանի չափը, թե տվյալ քաղաքական ուժի գաղափարները ժողովրդի քանի տոկոսն է կիսում, բաժանում: Ժողովրդի քանի տոկոսն է գիտակցաբար ընդունում այդ քաղաքական ուժի ծրագիրը, ճանաչում այդ քաղաքական ուժին: Չափման միավորը դա պետք է լինի, ոչ թե այն, թե տվյալ կուսակցություններն ունե՞ն մարդիկ, որ մեծամասնականով դնեն եւ հաջողեն:
– Եթե հարյուր տոկոսանոց համամասնականի անցնելու առաջարկը չանցնի, ՀՅԴ-ն մեծամասնականով առաջադրելո՞ւ է թեկնածուներ:
– Կարծում եմ` հավանաբար կլինեն, բայց մրցակցության հնարավորությունները նույնը չեն, որովհետեւ մրցակցության պայմանները նույնը չեն: Այլ կլիներ, եթե Ընտրական օրենսգիրքը տառացիորեն գործադրվեր` ոչ ոք ընտրակաշառք չկարողանար բաժանել, լինեին համահավասար պայմաններ, բնականաբար կարծում եմ, որ քաղաքական ուժերն ավելի մեծ հնարավորություն կունենային մրցելու:
– Նաեւ այսօր ոմանք կարծում են, որ հնարավոր է Դաշնակցությունն անգամ չկարողանա մտնել խորհրդարան: Նման սցենարի պատրա՞ստ եք:
– Գուցե որոշներն իրենց ցանկության մասին են խոսում եւ ոչ թե իրականության:
– 2008-ի ընտրություններից հետո Դաշնակցությունը կոալիցիա կազմեց ՀՀԿ-ի հետ: Այսօր նաեւ շեշտվում է, որ եթե քաղաքական ուժերը ձայներ են հավաքում, ապա պիտի իրենց ստացած ձայները չտան այլ քաղաքական ուժի, քաղաքական առեւտուր չլինի:
– Մենք կոալիցիայի մեջ էինք, հետո նորից հայտնվեցինք կոալիցիայի մեջ: Ուրեմն չփոխվեց մեր կեցվածքը:
– Դրանով սատարեցիք Սերժ Սարգսյանին:
– Դա սատարել չի, դա համագործակցել է: Այդ համագործակցությունը վերջ գտավ այն օրը, երբ տեսանք, որ այդ համագործակցությունից օգուտ չկա:
– Հիմա հնարավո՞ր է նորից համագործակցեք:
– Ամեն ինչ քաղաքականության մեջ հնարավոր է: Ով որ ձեզ հակառակն ասի, կնշանակի ձեզ խաբում է: