RedStrong Red (default) BlueCalm Blue GreenFresh Green

Chose your color scheme.

Հրանտ Մարգարյան.«Եթե երկխոսության նպատակը մեկը մյուսին ծնկի բերելն է, դա առճակատման մի այլ տարբերակ է»

Posted on July 9, 2011, by , under Հարցազրույցներ.

ՀՅԴ Բյուրոյի ներկայացուցիչ Հրանտ Մարգարյանը պատասխանում է «Ազգ»-ի հարցերին

Անցած շաբաթ, 7-օրյա ընթացքից հետո ավարտվեց ՀՅԴ ընդհանուր ժողովը: Ժողովի հրապարակային մասում հնչած ելույթներից եւ բյուրոյի նոր կազմի հրապարակումից բացի` մամուլում ժողովի քննարկումների մասին այլ տեղեկատվություն չի եղել, քանի որ այն փակ է շարունակվել: Երեկ ՀՅԴ նոր Բյուրոյի հին ներկայացուցիչ Հրանտ Մարգարյանին հարցեր ուղղելու հնարավորություն ստացավ մի քանի լրագրող:

«Ազգը» բախտ չունեցավ այդ մինի ասուլիսին ուղիղ հարց հնչեցնել, նախօրոք չէինք զանգահարել դրա համար, սակայն Հ. Մարգարյանի պատասխանները լսել հաջողեցինք, ավարտին առանձին հարցեր ուղղելով նրան: «Ազգին» հատկապես հետաքրքրում էր, թե ՀՅԴ բյուրոյի նոր կազմում Եվրոպայի եւ մասամբ ամերիկյան մայրցամաքի ներկայացված չլինելու հանգամանքը արդյոք բացասական անդրադարձ չունի` տարածքային մասնակցության առումով. «Իրենք մասնակից են մեր գործին, մեր աշխատանքին, դա նոր երեւույթ չէ, բացառիկ երեւույթ չէ, որ այդպիսի վիճակ է ստեղծվել: Ժողովի կամքն է դա: Դաշնակցության ժողովը բյուրո է ձեւավորում գաղտնի փակ քվեարկությամբ: Եվ աշխարհագրական խթաններ գոյություն չունեն, որ պետք է այս մասն այստեղից լինի, այն մասն` այնտեղից: Մենք մեր լավագույնների միջից ենք ընտրում բյուրո: Լավագույններն իհարկե շատ են: Մեր կազմն այս տարի փոխոխություն կրեց, 11-ի փոխարեն 9 անդամ ընտրվեց: Ավելի մոբիլ, շարժուն բյուրո ձեւավորվեց: Ես համոզված եմ, որ մեր կուսակցության մեջ 10-15 հոգանոց կազմը չէ, որ կարող է հրաշքներ գործել: Մենք դա կարող ենք անել մեր կազմակերպության շարքայինից մինչեւ տեղական ղեկավար մարմինների մեջ եղած պատասխանատուների միջոցով: Ընտրության արդյունքով ստեղծված վիճակ է, բայց դա չի նշանակում, որ այդ շրջանները մեզ համար նվազ կարեւորություն ունեն, դրանք մեր ռազմավարության մեջ մեծ կարեւորություն ունեն, եւ մեր կառույցն այդ աշխարհամասերում մեծ դերակատարություն ունի: Հյուսիսային Ամերիկայից` Կանադայից անդամ ունենք, Հարավային Ամերիկայից ունենք, Եվրոպայից ունենք այն առումով, որ Մկրտիչ Մկրտիչյանը Հունաստանից է: Բայց դա երկրորդական է, որովհետեւ բյուրոյի որեւէ ընկեր աշխարհագրական մասով չի պայմանավորում իր գործունեությունը, իր աշխատանքի դաշտն ամբողջ կուսակցությունն է, ամբողջ կուսակցության ներուժն ու զորակցությունը պետք է ունենա», ի պատասխան «Ազգի» հարցի ասաց Հ. Մարգարյանը:

«Ազգի» հաջորդ հարցը վերաբերում էր նրան, թե արդյո՞ք ՀՅԴ գերագույն ժողովի քննարկումների ժամանակ միասնական տեսակետ է ձեւավորվել իշխանության եւ ընդդիմության հետ հարաբերությունների առումով. «Հիմնականում մեր անցած ժամանակվա քաղաքականության, Հայաստանի գերագույն մարմնի եւ գերագույն ժողովի կողմից ճշտված քաղաքական ուղեգծի վերահաստատումն է եղել ընդհանուր ժողովում, դա հրապարակված է պլատֆորմի տեսքով: Իսկ մարտավարական հարցերը հիմնականում վերաբերում են Հայաստանի կազմակերպությանը` նրա իրավունքն են, եւ ընդհանուր ժողովը չի միջամտում դրան»:

Իշխանություն-ընդդիմություն երկխոսությունը, որ հիմա ավելի պարզունակացավ մի տեսակ, ի՞նչ գնահատկանի է արժանացել ՀՅԴ-ում. «Իմ կարծիքով երկխոսությունն ընդհանրապես լավ երեւույթ է, եթե մենք երկխոսում ենք հարցերի լուծում բերելու համար: Եթե երկխոսության նպատակը մեկը մյուսին ծունկի բերելն է, դա բնականաբար առճակատման մի այլ տարբերակ է: Ես կուզեի որ մեր այսօրվա կոնկրետ հարցերը երկխոսության միջոցով կարողանայինք լուծել, չհետապնդելով, որ կարելի է երկխոսության հհետեւանքով կամք պարտադրել: Համենայն դեպս` երեւույթն ընդհանրապես դրական եմ համարում, բայց առանձին երկկողմանի քայլերի նկատմամբ կարող եմ ունենալ տարբեր կարծիք»:

Մյուս լրագրողների հարցերին Հ. Մարգարյանի պատասխանների արժանահիշատակ կտորներ եւս բերենք: Արդար ընտրությունների միջոցով համակարգային իշխանափոխության անհրաժեշտության մասին խոսելով` Հ. Մարգարյանն ասում էր, թե Հայաստանը պետք է դադարի նախագահական երկիր լինելուց եւ դառնա խորհրդարանական երկիր, բայց նաեւ` սոցիալական, իրավական երկիր, պետք է պետական համակարգը, տնտեսական քաղաքականությունը փոխվի, Ազգային ժողովը դառնա 100 տոկոսով համամասնական: Հայաստանի ներքաղաքական վիճակը գնահատելիս` նախ երկրի վիճակը ծանր գնահատեց` սոցիալ-տնտեսական ներկա քաղաքականությունը ժողովրդի շատ սահմանափակ մի շերտի պահանջներն է բավարարում, եւ ժողովրդի մեծ մասը թավալգլոր դեպի աղքատություն է գլորվում, իսկ իշխանափոխությունը (ընտրություններով) պետք է անել նոր ծրագիր մեջտեղ բերելով: Խոսելով ընտրություններով համակարգ փոխելու անհնարինության դատողությունների մասին` նկատեց. «ժողովուրդն է, որ պետք է համոզվի, հավատա, որ ժողովրդավարությամբ կարող է իր կյանքում փոփոխություն բերել: Ինքը պետք է հավատա, որ իր քվեն արժեք է: Եթե արժեք չլիներ, դրա համար իրեն 5000 դրամ չէին վճարի. դա նշանակում է` արժեք է, որ 5000 դրամ վճարում են… Իշխանությունների կեղծելու ռեսուրսը սահմանափակ է, դա բացարձակ չէ, եթե մեր ժողովուրդը ոտքի ելնի, տեր կանգնի իր արժանապատվությանը, իր քվեին»:

Ընդդիմադիր դաշտում ընտրություններից առաջ կարո՞ղ են նոր ընդդիմադիր միավորումներ ստեղծվել, որտեղ գուցե ՀՅԴ-ն էլ լինի` այս հարցը ՀՅԴ բյուրոյի ներկայցուցիչը դիտարկեց արդեն բազմիցս արտահայտած տեսակետի պրիզմայով, թե պետք չէ քաղաքական դաշտը սեւ-սպիտակի վերածել, հնարավոր համարեց ընդդիմադիր դաշտում ավելի մեծ միավորի(ների) ձեւավորումը ծրագրերի շուրջ. «Կարեւոր է, որ այդ միավորումը ունենա հստակ թիրախներ, պետք է ճշտված լինեն այդ թիրախները, պետք է ունենա ծրագիր, պետք է ունենա գործունեության ձեւ, ուղղություն, ոճ եւ ճիշտ ղեկավարում: Եթե չունի այս երեքը, այդ միավորումը շինծու է եւ երկիրը տանելու է սեւ ու ճերմակի, երկիրը տանելու է այն ուղղությամբ, որ կամ Սերժ, կամ Լեւոն կամ մեկ ուրիշը, եւ ժողովուրդն անընդհատ պարտավորվելու է վատի ու վատթարագույնի մեջ ընտրություն կատարել», ասաց` չբացառելով միավորումը դաշինքների մեջ որեւէ ճամբարում:

Անդրադարձ անելով ղարաբաղյան թեմային` Մարգարյանը նկատեց, թե ունեն լուրջ մտահոգություններ Ղարաբաղի հարցի վերաբերյալ, Ղարաբաղի հարցի բանակցությունների առնչությամբ, ունեն այդ մտահոգությունները նաեւ Ղարաբաղի իշխանությունները: Իսկ թե ո՞ւր է գնում ղարաբաղյան կարգավորման գործընթացը, ըստ Մարգարյանի,17 տարվա բանակցությունների հիմքը սխալ է դրված, որովհետեւ հիմքում դրվել է ԼՂԻՄ-ը, եւ ոչ թե ԼՂՀ-ն, սխալ հիմքով բանակցությունները բերել հասցրել են այս վիճակին, որտեղ տարբեր միջազգային կազմակերպություններ, առանձին ղեկավար պատասխանատուներ իրենց զանազան շահերից ելնելով փորձում են առավելագույն ճնշում բանեցնել, որպեսզի հասնեն եզրակացության. «Մեզ թվում է, որ հարցն այնքան է հետզհետե լրջանում, որ գուցե անհրաժեշտություն ստեղծվի, որ մենք բարձրացնենք Լեռնային Ղարաբաղի անկախությունը ճանաչելու հարցը: Նախ մենք համոզված ենք, որ ԼՂՀ-ն եւ ՀՀ-ն պետք է ստորագրեն ռազմավարական դաշինք, որը կլինի նախաքայլը անկախության ճանաչման: Բայց եթե ճնշումները պետք է շատանան, մենք չպետք է վարանենք այդ քայլին դիմել», ասաց նա` նշելով. «Մենք մաքսիմալիստ չենք, հավատում ենք, որ բանակցությունների միջոցով հնարավոր է հարցը կարգավորել: Հավատացած ենք, որ պետք է իսկապես լինեն փոխզիջումներ, բայց այսօր մեզ թվում է, որ խոսքը գնում է զիջումների, ոչ թե փոխզիջումների մասին… հայ ժողովուրդը ամբողջ աշխարհով մեկ պետք է կարողանա կեցվածք ցույց տալ, որովհետեւ Ղարաբաղը մեզ համար մեր հայրենիքի մի մասի ազատագրումն է, եւ մենք իրավունք չունենք այս հաղթանակը մսխել»:

ՀՅԴ-ն արտաքին ու ներքին քաղաքականությունների համար իշխանություններից հրաժարական պահանջելո՞ւ է: Լրագրողներից մեկի այս հարցին ի պատասխան` Մարգարյանը նկատեց, թե դրանից արդեն դդումի համ է գալու, ինչպես որ արտահերթ ընտրությունների պահանջից է դդումի համ գալիս. «Պահանջել-չպահանջելու մեջ չէ, թե ոնց ենք տեսնում մեր երկրի ապագան: Այս երկիրը դրախտ չի դառնա, եթե Սերժ Սարգսյան անունը փոխվի եւ դառնա Լեւոն Տեր-Պետրոսյան: Տեսել ենք Լեւոն Տեր-Պետրոսյանի ժամանակը, շատ ավելի վատ պայմաններով, դրանով բան չի փոխվի, կամ փոխվի ու դառնա Հրանտ Մարգարյան»:

«Հիմա իշխանությո՞ւն եք, թե՞ ընդդիմություն», վերջում հարցրինք ՀՅԴ բյուրոյի ներկայացուցիչ Հ. Մարգարյանին: «Մենք Դաշնակցություն ենք», ի պատասխան ասաց Մարգարյանը:

ՄԱՐԻԵՏԱ ԽԱՉԱՏՐՅԱՆ

Leave a Comment