Հանդիպումներ քաղաքական դէմքերու հետ
[1]
Հարաւային Ամերիկայի հայաշատ գաղութներ այցելութիւններու ծիրեն ներս, ՀՅԴ Բիւրոյի ներկայացուցիչ ընկ. Հրանդ Մարգարեան այցելեց Ուրուկուայ և մայրաքաղաք Մօնթէվիտէօ: Կարգ մը հանդիպումներ ունեցաւ թէ պետական և թէ համայնքային մակարդակներու վրայ։ Իրեն կ՛ընկերակցէին ՀՅԴ Հարաւայի Ամերիկայի ԿԿի անդամներ, Էտուարտօ Կոստանեանը և Արփի Հոճաճանեանը։
Պետական մակարդակի վրայ ընկ Հ. Մարգարեանի առաջին հանդիպումը, հայասէր և Հայ Դատի պաշտպան ծերակուտական, Ուրուկուայ-Հայաստան բարեկամութեան խումբի նախագահ, Ռուպէն Մարթինէս Ուէլմոյի գրասենեակն էր, ուր շատ ջերմ խօսակցութիւն ծաւալեցաւ Հայ Դատի և Արցախի շուրջ, քանի որ պետական այս անձնաւորութիւնը ոչ միայն քաջատեղեակ է այդ հարցերուն, այլև դերակատար և գործունեայ աշխատանքով հետևողական է, մեզի համար կենսական այդ հարցերու կապակցութեամբ, ինչ որ շատ տպաւորեց ընկ. Հրանդ Մարգարեանին։
Երկրորդ հանդիպումը, իշխող Լայն Ճակատ Ընկերվարական Կուսակցութեան նախագահ, Խավիէր Միրանտայի հետ էր։ Այստեղ ևս ընկ. Հրանդ Մարգարեանը նկատեց թէ որքան լաւ ծանօթութիւններ ունի և մօտէն կը հետաքրքրուի Պր. Միրանտան, հայկական հարցերուն, ի մասնաւորի Հայ Դատի ճամբով տարւող քարոզչական աշխատանքներուն։
Ընկ. Հրանդ Մարգարեանը նաև կարևոր հանդիպումներ ունեցաւ ՀՅԴ Արմենիա Երիտասարդակ Միութեան անդամներու հետ, որոնց ընդհանուր գիծերով տեղեակ պահեց Մայր Հայրենիքի մէջ Դաշնակցական երիտասարդներու գործունէութան մասին, նաև կարևորելով Հայաստանէն հազարաւոր մղոններով հեռու մեր շրջանի երիտասարդականներու ուսերուն դրուած պատասխանատւութիւնը, յատկապէս սերնդափոխութեան գրծընթացի հետ միասին, իրենց ստանցնելիք դերակատարութեան շուրջ։ Ապա տեղի ունեցաւ երիտասարդներու կողմէ տրուած շարք մը հարցումներ, որոնց ընկ. Հրանդը պատասխանեց մանրամասնելով և լուսաբանութիւններ տալով երիտասարդներու շահաքրքիր հարցումներուն։
Վռամեան Կոմիտէութեան շարքային ընկերներու հետ ունեցած հանդիպումի ընթացքին, ընկ. Հրանդը բաւական մանրամասնութիւններով, փոխանցեց Հայաստանի այսօրուայ իրավիճակը և վերանկախացումէն ասդին Դաշնակցութեան ստանցնած դերը, թէ քաղաքական, թէ ընկերային և թէ տնտեսական ոլորտներու մէջ։ Տեղի ունեցաւ հարց պատասխանի բաժին ուր ՀՅԴ Բիւրոյի ներկայացուցիչ ընկերը եղած բազմաթիւ հարցումներուն, ծաւալուն լուսաբանութիւններ տուաւ։
Ընկ. Հրանդ Մարգարեանը նաև այցելեց Կոմիտաս Ռատիօժամի լսարանը ուր շահեկան հարցազրոյց մը ունեցաւ։
Ընկերոջ Հարաւային Ամերիկայ հայաշատ գաղութներու տուած այցելութեան վերջին հանգրուանը, Պրազիլիոյ Սան Փաուլօ քաղաքն էր։
Կարօ Հէքիմեան